बारा, १७ असोज । बाराको सुवर्ण गाउँपालिका बडादशैँको रमाइलोबीच अकस्मात् तनावको केन्द्रबिन्दु बनेको छ । विकास बजेटको दुरुपयोग भएको आरोपका बीच बिहीबार राति गाउँपालिका कार्यालयमै ‘डान्स पार्टी’ र मदिरा सेवन भइरहेको भन्ने समाचार बाहिरिएपछि स्थानीय युवाहरू आक्रोशित हुँदै कार्यालयलाई नै घेराउ गरेका थिए ।

घटनाबारे बाराका प्रहरी प्रमुख एसपी सन्तोष तामाङका अनुसार स्थिति नियन्त्रण गर्न प्रहरीले करिब चार राउन्ड आश्रुग्यास प्रहार गर्नुपरेको थियो । ‘स्थानिय आक्रोशित भएपछि स्थिति बिग्रन सक्ने भएकाले बल प्रयोग गरेर नियन्त्रणमा लिइयो,’ उनले भने ।

घेराउको निशानामा परेका गाउँपालिका अध्यक्ष राजेश प्रसाद यादवले भने आफूहरूमाथि लगाइएका आरोप निराधार भएको दाबी गरेका छन् । उनका अनुसार दशैँ मेलाको अवसरमा भारतको बिहारबाट आएका टिकटक कलाकारहरूलाई ‘कवहीगोठ’मा आयोजना गरिएको सांस्कृतिक कार्यक्रममा सहभागी गराउन बोलाइएको थियो ।

‘अतिथि कलाकारहरूलाई पालिका कार्यालयमै खाना खुवाइएको मात्र हो । कार्यालयभित्र मदिरा पार्टी वा नाचगान भएको होइन,’ यादवले स्पष्ट पारे । तर, स्थानीय युवक अजय यादवलगायतका प्रत्यक्षदर्शीहरूले भने फरक दाबी गरेका छन् । उनका अनुसार पालिका अध्यक्ष आफ्ना परिवार र केही व्यक्तिहरूसँगै कार्यालयमै मदिरा सेवन गर्दै युवतीलाई नचाइरहेका थिए । ‘हामीले देखेकै कारण विरोध गर्न पुगेका थियौँ । उल्टै प्रहरीले हामीलाई धकेलेर धम्कीसमेत दियो,’ यादवले भने ।

तनावको मूल जड भने कार्यक्रमका लागि खर्च भएको भनिएको रकम हो । स्थानीयवासीले पालिकाको विकास बजेटबाट साढे १७ लाख रुपैयाँ पेस्की निकालिएको र सो रकम मेलामा हुने नाचगान, कुस्ती र अन्य सांस्कृतिक कार्यक्रममा प्रयोग भएको दाबी गरेका छन् । तर, सो रकम वास्तवमै कहाँ खर्च भयो भन्नेबारे अझै स्पष्ट विवरण सार्वजनिक भएको छैन ।

स्थानीय बुद्धिजीवीहरू भन्छन्, ‘सडक, खानेपानी, विद्यालय जस्ता आधारभूत विकास योजनामा लगाउनुपर्ने बजेट पार्टी, सांस्कृतिक भेषमा मनोरञ्जनमा खर्चिनु दुरुपयोगको उदाहरण हो ।’ यसबारे जवाफदेहीको माग गर्दै उनीहरूले प्रदेश र संघीय सरकारको पनि ध्यानाकर्षण गराएका छन् ।