पर्सा, १७ असोज । वीरगंजको आदर्शनगरमा मंगलबार राति मेलामा भएको ग्याङ फाइटका क्रममा एक युवकको मृत्यु भएपछि प्रहरीले ४८ घण्टाभित्रै मुख्य अभियुक्तसहित पाँच जनालाई पक्राउ गरेको छ । ‘अप्रेसन च्यालेन्ज’ नामक विशेष अनुसन्धान रणनीति सञ्चालन गरेर प्रहरीले घटनामा संलग्न भएको ठोस प्रमाणका आधारमा उनीहरूलाई नियन्त्रणमा लिन सफल भएको हो ।

गत असोज १४ गते राति साढे ११ बजे दशैँ मेला चलिरहेका बेला २० वर्षीय शिवम साह कानु (उपनाम ‘गोल्डेन’) माथि ‘दरिन्दे खुङ्खार समूह’ नामक युवाहरूको टोलीले भाटाले आक्रमण गरेको थियो । गम्भीर घाइते भएका कानुको नारायणी अस्पतालमा उपचारकै क्रममा मृत्यु भएको थियो । प्रहरीको अनुसन्धानअनुसार यो घटना सामान्य विवाद नभई व्यक्तिगत रिसइबी र टोलमा आफ्नो प्रभुत्व जमाउने ‘इगो फाइट’ को परिणाम थियो ।

प्रहरीले घटनामा संलग्न भएको आरोपमा वीरगंज–२४ निवासी गौतम पटेल (मुख्य अभियुक्त), सुभांकर चौरसिया, करण पटेल, चन्दन चौरसिया र अमन पटवालाई नियन्त्रणमा लिएको छ । प्रहरीले बिहीबार जिल्ला प्रहरी कार्यालय पर्सामा पत्रकार सम्मेलन गरी उनीहरूलाई सार्वजनिक गरेको हो ।

पर्सा प्रहरी प्रमुख एसपी सुदिपराज पाठकले पत्रकार सम्मेलनमा भने, ’हत्यामा संलग्न सबै अभियुक्तलाई प्राविधिक अनुसन्धान र प्रत्यक्ष प्रमाणका आधारमा नियन्त्रणमा लिइएको छ । प्रारम्भिक अनुसन्धानले यो घटना व्यक्तिगत रिसइबीका कारण भएको देखाएको छ ।‘

अनुसन्धानका क्रममा खुलेको विवरण अनुसार पक्राउ परेका अभियुक्तहरूले सामाजिक सञ्जाल (ह्वाट्सएप) मा ‘दरिन्दे खुङ्खार समूह’ नामक ग्रुप बनाएर आफूलाई टोलको गुण्डा, दबंग र प्रभुत्वशाली देखाउन खोजिरहेका थिए । यही समूहकै सदस्यहरूले पुरानो विवादलाई मेलामा आक्रामक ढङ्गले अगाडि बढाउँदै कानुमाथि भाटाले प्रहार गरेका थिए ।

प्रहरीले घटनामा प्रयोग भएका भाटा समेत बरामद गरेको छ । अनुसन्धानले मुख्य अभियुक्त गौतम पटेल नै उक्त ह्वाट्सएप ग्रुपको संस्थापक भएको पुष्टि गरेको छ ।

मृतक कानु सामान्य परिवारका थिए । उनी हाल वीरगंज–१० मा बस्दै आएका थिए । केही समयअघि मात्रै भारतमा काम गरेर फर्किएका उनले १० दिनअघि छोराको बुबा बनेर नयाँ जिम्मेवारी बोकेको परिवारलाई खुशी बाँडिरहेका थिए । तर, दशैँ मेला हेर्न घरबाट निस्केका उनी ग्याङ फाइटमा ज्यान गुमाउन पुग्दा परिवार गहिरो शोकमा डुबेको छ ।

हत्या प्रकरणलाई छिट्टै सल्टाउन प्रहरीले विशेष रणनीति तयार गरेर ‘अप्रेसन च्यालेन्ज’ सञ्चालन गरेको थियो । एसपी पाठकको प्रत्यक्ष निगरानीमा प्रहरी निरीक्षक निरोज चौलागाईंको कमाण्डमा ३२ जना प्रहरी परिचालन गरिएको थियो ।

शुरुवाती चरणमा एक दर्जन शङ्कास्पद व्यक्तिलाई नियन्त्रणमा लिइएको थियो । तीमध्ये अमन पटवालाई अनुसन्धान गर्दा कानु हत्याबारे ‘क्लु’ पत्ता लाग्यो । प्राविधिक अनुसन्धान र मोबाइल कल डिटेल्सले अमनले हत्याको व्यवस्थापन गरेको, मुख्य अभियुक्त गौतमसँग निरन्तर सम्पर्कमा रहेको र घटनास्थलमा प्रयोग भएको भाटासमेत जोडिएको प्रमाण पत्ता लागेपछि सम्पूर्ण अभियुक्तलाई नियन्त्रणमा लिइएको हो ।

पक्राउ परेका पाँचै जनामाथि ‘ज्यानसम्बन्धी कसुर’ मुद्दा दर्ता गरेर कानुनी प्रक्रिया अघि बढाउने तयारी भएको प्रहरीले जनाएको छ । दशैँ बिदाका कारण अदालत बन्द भए पनि खुल्नेबित्तिकै उनीहरूको म्याद थप गरी विस्तृत अनुसन्धान अघि बढाइने प्रहरीले जनाएको छ ।