काठमाडौं, १५ असोज । राष्ट्रिय विपद् जोखिम न्यूनीकरण तथा व्यवस्थापन प्राधिकरणले असोज १७ देखि २० गतेसम्म देशका विभिन्न प्रदेशमा भारी वर्षा हुने सम्भावना रहेको भन्दै उच्च सतर्कता अपनाउन आग्रह गरेको छ ।

प्राधिकरणले जल तथा मौसम विज्ञान विभागको पूर्वानुमान उद्धृत गर्दै विशेष गरी कोशी, मधेश, बागमती, गण्डकी र लुम्बिनी प्रदेशका जिल्लाहरूमा मध्यमदेखि भारी वर्षा हुने चेतावनी दिएको हो । यस अवधिमा नारायणी, बागमती, कमला र कोशी नदीमा बहाव खतरा तह नजिक पुग्ने देखिएकाले आकस्मिक डुबान र बाढीको जोखिम उच्च रहेको प्राधिकरणले जनाएको छ ।

सूचनामा बागमती प्रदेशको काठमाडौँ उपत्यका, काभ्रे, सिन्धुपाल्चोक, रसुवा, मकवानपुर, चितवन, कोशी प्रदेशका सङ्खुवासभा, ताप्लेजुङ, इलाम, झापा, मोरङ, मधेश प्रदेशका बारा, पर्सा, सर्लाही, रौतहट लगायतका जिल्लामा बढी जोखिम रहने प्रष्ट पारिएको छ ।

‘दशैँको भीडभाडलाई ध्यानमा राख्दै अनावश्यक यात्रा टार्न र विशेषगरी रातको समयमा यात्रा नगर्न अनुरोध गर्दछौँ,’ प्राधिकरणद्वारा जारी सूचनामा भनिएको छ ।

प्राधिकरणले सम्बन्धित जिल्ला विपद् व्यवस्थापन समितिहरूलाई आवश्यक परे सवारी सञ्चालनमा रोक लगाउन सक्ने र सो निर्णय पालना गर्न सर्वसाधारणलाई आग्रह गरेको छ । साथै पहिरोको जोखिमयुक्त क्षेत्र र नदी किनारमा बसोबास गर्ने बासिन्दालाई विशेष सतर्कता अपनाउन र सम्भावित डुबान क्षेत्रका जनतालाई सुरक्षित स्थानबारे अग्रिम जानकारी लिन–दिन पनि आह्वान गरिएको छ ।

तीनै सुरक्षा निकाय, स्थानीय तह, स्वयंसेवक र सरोकारवाला संस्थालाई पूर्वतयारी, पूर्वकार्य र प्रतिकार्यमा सक्रिय रहन निर्देशन दिइएको छ । विशेषगरी जोखिमयुक्त सडक र राजमार्गमा डोजर, एक्साभेटर, लोडर लगायतका उपकरण तयारी अवस्थामा राख्नुपर्नेमा प्राधिकरणले जोड दिएको छ ।