जनकपुरधाम, १५ असोज । जनकपुरधामस्थित हंसराज मिठाई पसलका कामदारले पत्रकार ध्रुव कुमार झा र महिला पत्रकार प्रिया कर्णमाथि गरेको दुर्व्यवहार घटनाले स्थानीय समाजदेखि पत्रकार महासंघसम्म आक्रोश फैलिएको छ । घटनालाई प्रेस स्वतन्त्रता र लोकतान्त्रिक मूल्य–मान्यतामाथिको गम्भीर आघातका रूपमा लिइएको छ ।

हंसराज मिठाई पसलका कामदारले बाटो हिँडिरहेकी महिला पत्रकार कर्णलाई जिस्काएका थिए । सो घटनाको विरोध गर्दै पत्रकार ध्रुव झाले प्रश्न उठाउँदा उल्टै कामदारहरूले उनीहरूलाई हातपात गरेका थिए ।

महिला पत्रकारलाई जिस्काउने मात्र नभई विरोध गर्ने पत्रकारलाई शारीरिक रूपमा आक्रमण गरिएको घटनाले स्थानीय पत्रकार समुदाय आक्रोशित बनेका छन् । पीडित पत्रकारहरूले यस घटनाबारे आवश्यक छानबिन गरी दोषीलाई कारबाहीको दायरामा ल्याउन माग गरेका छन् ।

यसैबीच, नेपाल पत्रकार महासंघ प्रदेश कमिटीले घटनालाई गम्भीरतापूर्वक लिँदै दोषीलाई कानुनी दायरामा ल्याउन माग गरेको छ । महासंघका सचिव हदिश खुद्दारले कुनै पनि असन्तुष्टि भए कानुनी बाटोबाट समाधान खोज्न सकिने प्रक्रिया रहेपनि पत्रकारमाथि आक्रमण गर्ने प्रवृत्ति अक्षम्य रहेको टिप्पणी गरे । उनले यस्तो क्रियाकलाप तत्काल अन्त्य हुनुपर्नेमा जोड दिएका छन् ।

त्यस्तै, मधेशी पत्रकार समाज धनुषाले समेत विज्ञप्ति जारी गरी घटनाप्रति दुःख व्यक्त गर्दै दोषीमाथि कडाभन्दा कडा कारबाहीको माग गरेको छ । समाजका अध्यक्ष सुभाष कर्णले भने, ‘महिला पत्रकारलाई जिस्काउने र सम्झाउन खोज्दा उल्टै गुण्डा परिचालन गरी पत्रकारलाई कुटपिट गर्नु भनेको अपराधलाई संरक्षण गर्ने काम हो । यस्तो घृणित कार्य न पत्रकारलाई स्वीकार्य हुन्छ, न समाजलाई ।’ उनले यस घटनाले पत्रकारिता मात्र नभई लोकतान्त्रिक मूल्य र अभिव्यक्ति स्वतन्त्रतामाथि समेत आघात पुर्याएको टिप्पणी गरे ।

समाजका सरोकारवाला निकायहरूले छानबिन पारदर्शी ढंगले गर्नुपर्ने र दोषीमाथि कारबाही नभए भविष्यमा यस्ता घटना दोहोरिन सक्ने चेतावनी दिएका छन् ।

जनकपुरधाममा यसअघि पनि व्यवसायिक प्रतिष्ठानसँग सम्बन्धित विवादमा पत्रकारहरूमाथि दबाब, धाकधम्की र असुरक्षाको घटना हुने गरेको छ ।