जनकपुरधाम, १५ असोज । जनकपुरधामस्थित हंसराज मिठाई पसलका कामदारले पत्रकारमाथि हातपात गरेको घटना सार्वजनिक भएको छ ।

सडकमा ठेला लगाएर मिठाई बेच्ने क्रममा हंसराज मिठाई पसलका कामदारमध्ये एकजनाले बाटो हिँडिरहेकी एक महिला पत्रकारलाई जिस्काएका थिए । पीडित पत्रकारले पनि कामदारले आफूलाई दुर्व्यवहार गरेको बताएकी छन् ।

सो दृश्य देखेपछि त्यहाँ उपस्थित पत्रकार ध्रुव कुमार झाले विरोध जनाएका थिए । तर, पत्रकार झाले प्रश्न गर्दा कामदारहरूले उल्टै दुर्व्यवहार गर्दै हातपात गरेको बताइएको छ । स्थानीयका अनुसार कामदारहरू हंसराजकै घरतर्फबाट निस्केर आएको देखिएको थियो ।

पत्रकार झाका अनुसार आफूले महिला पत्रकारमाथि भएको दुर्व्यवहारको विरोध गर्दा कामदारहरूले गुण्डा परिचालन गरी कुटपिटसमेत गरेका छन् । उनले यस्तो गैरकानूनी कृत्यमा संलग्न व्यक्तिलाई कारबाही गर्न माग गरेका छन् ।

घटनापछि जनकपुरधामको सामाजिक परिवेशमा व्यापक असन्तुष्टि देखिएको छ । विभिन्न संघसंस्था र नागरिक समाजले पत्रकारमाथि भएको आक्रमणको भर्त्सना गर्दै दोषीलाई कारबाही गर्न सम्बद्ध निकायलाई आग्रह गरेका छन् ।

जनकपुरको जानकी मन्दिर अगाडिको मुख्य पसलमार्फत आफ्नो व्यापार विस्तार गरिरहेका हंसराजका कामदारमाथि पटक–पटक स्थानीयवासीले बाटो अतिक्रमण गर्ने, सार्वजनिक यातायातमा अवरोध सिर्जना गर्ने र ग्राहकसँग दुर्व्यवहार गर्ने आरोप लगाउँदै आएका थिए । तर, महिला पत्रकारलाई जिस्काउने र पत्रकारमाथि हातपात गर्ने हालैको घटना भने सर्वाधिक चर्चामा आएको छ ।

नागरिक समाजले पनि प्रहरी प्रशासनलाई तत्काल अनुसन्धान गरी दोषीलाई कानुनी दायरामा ल्याउन दबाब दिएका छन् ।