पर्सा, १५ असोज । दशैँको उल्लास बीच वीरगंजमा आयोजित मेलामा मंगलबार राति हिंसात्मक घटना हुँदा एक युवकको ज्यान गएको छ ।

पर्सा प्रहरीले दिएको जानकारी अनुसार मेलामा पसल राख्ने विषयलाई लिएर सुरु भएको विवाद ग्याङ फाइटमा परिणत हुँदा २० वर्षीय ‘गोल्डेन’ (पूरा परिचय खुल्न बाँकी) नाम गरेका युवकको मृत्यु भएको हो ।

प्रहरी प्रवक्ता तथा डिएसपी हरिबहादुर बस्नेतका अनुसार मेलाको शुरुवातमै गीता मन्दिर नजिक दुई समूहबीच विवाद सुरु भएको देखिएको छ । राति झगडा चर्किँदै गएपछि ती युवकमाथि भाटो प्रहार भएको प्रारम्भिक अनुसन्धानले देखाएको छ । गम्भीर घाइते भएका उनलाई तत्कालै नारायणी अस्पताल पुर्याइए पनि उपचारकै क्रममा राति मृत्यु भएको प्रहरीले जनाएको छ ।

घटनामा संलग्न भएको आशङ्कामा प्रहरीले तीन जनालाई नियन्त्रणमा लिएको छ । तर, अनुसन्धान प्रारम्भिक चरणमा रहेको कारण उनीहरूको परिचय सार्वजनिक नगरिएको प्रहरीले जनाएको छ । डिएसपी बस्नेतले भने, ‘विवादको वास्तविक कारण अझै खुलेको छैन । नियन्त्रणमा लिइएकासँग विस्तृत सोधपुछ भइरहेको छ । थप विवरण अनुसन्धानपछि मात्र स्पष्ट हुनेछ ।’

मृतक युवकको शव पोस्टमार्टमका लागि नारायणी अस्पतालमै राखिएको छ । परिवारजनलाई खबर गरिएको र घटनाबारे सम्पूर्ण विवरण सार्वजनिक गर्ने तयारी भइरहेको प्रहरीले जनाएको छ ।