जनकपुरधाम, १५ असोज । महाअष्टमीको अवसरमा जनकपुरधामस्थित प्रसिद्ध शक्तिपीठ राजदेवी मन्दिरमा बोकाबलि सम्पन्न भएपछि बुधबार बिहानदेखि नै मन्दिर परिसरमा व्यापक सरसफाइ गरिएको छ ।

रातभर चलेको बलिप्रदान र हजारौं भक्तजनको भीडपछिको फोहोर व्यवस्थापनलाई ध्यानमा राख्दै मन्दिर क्षेत्रलाई सफा राख्ने उद्देश्यले सरसफाइ अभियान सञ्चालन गरिएको हो ।

राजदेवी मन्दिरमा यस वर्ष करिब १५ हजार नजिक बोकाको बलि दिइएको थियो । बलिपश्चात् उत्पन्न भएको रक्ताम्य अवस्था, भिजेको जमिन, बोका काट्ने स्थानमा बनेका दुर्गन्ध र प्लास्टिक, कागज लगायतका फोहोरलाई व्यवस्थित गर्न बिहानैदेखि जनकपुरधाम उपमहानगरपालिका, क्लवका स्वयंसेवक, सुरक्षा निकाय र स्थानीय सरोकारवालाले संयुक्त रूपमा काम गरेका थिए ।

महावीर युवा कमिटीका महासचिव भरत प्रसाद साहका अनुसार बलि सम्पन्न भएपछि करिब ५ सय स्वयंसेवकलाई सरसफाइमा खटाइएको थियो । ‘हजारौंको भीडपछिको वातावरणलाई शुद्ध बनाउन र भक्तजनलाई असुविधा नहोस् भन्ने उद्देश्यले तुरुन्तै सरसफाइ अभियान थालिएको हो,’ उनले भने ।

मन्दिर परिसरबाट सुरु गरिएको सरसफाइ क्रमशः आँगन र बाहिरी चोकसम्म विस्तार गरिएको थियो । बोका काट्ने क्रममा प्रयोग भएका डोरी, प्लास्टिक, बोरा लगायतका सामग्री सङ्कलन गरी नष्ट गरिएका छन् भने मन्दिर वरिपरिको बाटोमा पानी छर्केर धुलो नियन्त्रण गरिएको छ ।

स्थानीय बासिन्दा श्यामसुन्दर ठाकुर भन्छन्, ‘बलिपूजापछि मन्दिर परिसरमा दुर्गन्ध फैलिने समस्या विगतमा देखिँदै आएको थियो । यसपालि तत्काल सरसफाइ गरिएकोले वातावरण सहज भएको छ ।’