जनकपुरधाम, १४ असोज । बडा दशैँ, शुभ दीपावली तथा छठ पर्वको अवसरमा जिल्ला प्रहरी कार्यालय धनुषाले आम जनता, आगन्तुक तथा स्थानीय व्यवसायीहरूलाई सुरक्षा र सचेतनाका लागि विस्तृत निर्देशन जारी गरेको छ ।

प्रहरी कार्यालयले चाडपर्वको समयमा हुने भिडभाड, चोरी, लुटपाट, गुण्डागर्दी र सवारी दुर्घटनाजस्ता घटनाबाट बच्नका लागि जनमानसमा विशेष सतर्कता अपनाउन अनुरोध गरेको छ ।

प्रहरीले मन्दिर, मेला, जात्रा र अन्य सार्वजनिक स्थलमा अनावश्यक भिडभाड नगर्न आग्रह गरेको छ । भिडभाड हुने वा अशान्ति सिर्जना गर्ने गतिविधि देखिएमा तत्काल नजिकको प्रहरीलाई जानकारी दिन अनुरोध गरिएको छ ।

प्रहरीले घरबाहिर निस्कनुअघि झ्याल, ढोका र ताल्चा सुरक्षित गरिएको सुनिश्चित गर्न र सामाजिक सञ्जालमा आफ्नो यात्रा विवरण पोष्ट नगर्नु सुझाव दिएको छ । रातको समयमा अपरिचित व्यक्तिको आगमनमा ढोका खोल्दा सावधानी अपनाउन र बालबालिकालाई विश्वासिलो व्यक्तिको साथमा मात्र पठाउन पनि निर्देशन दिएको छ ।

चाडपर्वमा पटकाको प्रयोग नगर्न, बालबालिकालाई प्रज्वलनशील पदार्थबाट टाढा राख्न र विस्फोटक वा खतरनाक सामग्री देखिएमा प्रहरीलाई तुरुन्त खबर गर्न प्रहरी निर्देशनमा उल्लेख छ ।

होटल र लज सञ्चालकहरूले आगन्तुकको पहिचान खुल्ने कागजातसहित अभिलेख राख्नुपर्ने, मुख्य ढोका निगरानीमा राख्नुपर्ने र तोकिएको समयमा अनिवार्य बन्द गर्नुपर्ने प्रहरीको निर्देशन छ ।

प्रहरीले मादक पदार्थ सेवन गरी सवारी साधन नचलाउन, सिट बेल्ट र हेल्मेट अनिवार्य प्रयोग गर्न, सवारी चालक अनुमति पत्र नभएको व्यक्तिलाई सवारी नदिन र तिव्र गतिमा सवारी साधन नचलाउन निर्देशन दिएको छ । साथै, सार्वजनिक सवारी साधनमा क्षमता भन्दा बढी यात्रु नराख्न र बढी भाडा लिने चालकलाई जानकारी गराउन आग्रह गरिएको छ ।

कुनै पनि शंकास्पद व्यक्ति वा वस्तु देखिएमा तुरुन्त नजिकको प्रहरी वा यात्रु सहायता कक्षमा जानकारी गराउन आग्रह गरिएको छ । प्रहरी कार्यालयले सम्पर्कका लागि हॉटलाइन नम्बर १००, मोबाइल नम्बर ९८५४०९०४१९, ९८५४०२६०९० र सूचना अधिकारीसँग ९८५४०२६७७० नम्बर उपलब्ध गराएको छ ।