महोत्तरी, १४ असोज । गत भदौ २४ गते जेनजी आन्दोलनको भिडभाड र तनावपूर्ण परिस्थितिको मौका छोपी महोत्तरीको जलेश्वर कारागारबाट फरार भएका कैदीबन्दीलाई कारागार प्रशासनले यही असोज २० गतेसम्म स्वेच्छाले फर्किन अन्तिम मौका प्रदान गरेको छ ।

कारागार कार्यालय जलेश्वरले एक सूचना जारी गर्दै तोकिएको मितिभित्र कारागार फर्की नआउने फरार कैदीबन्दीमाथि कारागार ऐन २०७९ र अन्य प्रचलित कानुनबमोजिम कठोर कारबाही हुने चेतावनी दिएको छ । उक्त सूचनामा जेलर अशोक क्षेत्रीले फरार कैदीलाई समयसीमा नाघेपछि कानुनी परिणाम भोग्नुपर्ने चेतावनी दिएका छन् ।

कारागार प्रशासनले फरार कैदीलाई मात्र नभई उनीहरूलाई लुकाउने, आश्रय दिने वा सहयोग गर्ने व्यक्तिहरूमाथि समेत कानुनी कारबाही हुने चेतावनी दिएको छ । ‘फरारलाई लुकाउने वा सहयोग गर्ने व्यक्ति पनि कसुरदार ठहरिने छन् र प्रचलित कानुनअनुसार सजाय पाउनेछन्,’ सूचनामा उल्लेख गरिएको छ ।

गत भदौ २४ गते जलेश्वर कारागारमा रहेका ५७६ जना कैदीबन्दी सबै फरार भएका थिए । तिनीहरूमध्ये ४० जना भारतीय नागरिकसमेत रहेका थिए । फरारमध्ये आज बिहानसम्म २६२ जना कैदी फिर्ता भइसकेको जेलर क्षेत्रीले जानकारी दिए । बाँकी कैदी अझै फरार अवस्थामा रहेकाले खोजी तथा नियन्त्रणका लागि प्रहरीले चर्को अभियान चलाइरहेको छ ।

जेनजी आन्दोलनकै क्रममा जनकपुरलगायत विभिन्न स्थानमा भएको तनावले सुरक्षा व्यवस्था कमजोर बनेको अवसरमा कैदीहरूले एकैपटक कारागार तोडेर फरार भएका थिए ।

फरार कैदीहरूको खोजीका लागि प्रहरी प्रशासनले महोत्तरीसहित मधेश प्रदेशका जिल्लामा चेकजाँच कडा पारेको छ । नाकानाकामा कडाइ गरिएको छ भने सम्भावित लुकाइने स्थानहरूमा प्रहरीको चाप बढाइएको छ ।