जनकपुरधाम, १४ असोज । बडादशैँको अवसरमा महोत्तरी जिल्लाको औरही नगरपालिका–७ स्थित प्रसिद्ध सोनामाई शक्तिपीठमा लाग्ने भूत मेलाले यस वर्ष पनि हजारौँ श्रद्धालु तथा दर्शनार्थीलाई आकर्षित गरेको छ । परम्परागत रूपमा षष्ठी तिथिदेखि सुरु हुने यो मेला विजयादशमीसम्म निरन्तर चल्नेछ ।

स्थानीय पुजारीहरूको भनाइअनुसार सोनामाई मन्दिरमा भूत मेलाको परम्परा परापूर्वकालदेखि चल्दै आएको छ । विशेषगरी भूतप्रेत, बोक्साबोक्सी र दुष्ट आत्माले सताइएका मानिसहरू यस मेलामा आएर देवीको शक्तिद्वारा निको हुने विश्वास रहँदै आएको छ ।

पुजारी कामेश्वर झाले भने, ‘हजारौँ पीडित मानिसहरू हरेक वर्ष यहाँ आइरहन्छन् । सोनामाई माताको कृपाले उनीहरू पीडाबाट मुक्त भएर फर्कने जनविश्वास रहँदै आएको छ ।’ अर्का पुजारी रमेश झाका अनुसार देवी दरबारसम्म पुग्ने क्रममा पीडितहरू आफूलाई कसरी सताइएको हो भन्ने कुरा खुलाउने गर्छन्, अनि माताको दृष्टि पर्नासाथ निको भएर फर्किन्छन् ।

मन्दिर परिसरमा पुग्ने बित्तिकै धेरै पीडित महिला–पुरुष विभिन्न अस्वाभाविक व्यवहार देखाउँदै ढल्ने, रुने, हाँस्ने वा अजीब गतिविधि गर्ने परम्परा छ । पुजारी झगरु झाले बताएअनुसार माताको दर्शन पाएपछि उनीहरू सामान्य अवस्थामा फर्कन्छन् । यसरी देवीको शक्ति अनुभव गर्ने वातावरण नै भूत मेलाको विशेषता हो ।

षष्ठीदेखि दशमीसम्म चल्ने यो मेलामा महोत्तरी, धनुषा, सिरहा, सर्लाही, रौतहटलगायत मधेश प्रदेशका जिल्लाबाट हजारौँ भक्तजन आउँछन् । साथै, काठमाडौं, हेटौँडा, धरान, विराटनगरदेखि भारतको सीतामढी, मधुबनी, पटनासम्मका श्रद्धालुहरूको उपस्थिति पनि रहने गर्दछ ।

भूत मेलाले धार्मिक आस्थामात्र नभई सामाजिक तथा सांस्कृतिक एकताको पनि संदेश दिने गर्दछ । मेलामा विभिन्न जातजाति र समुदायका मानिसहरूको सहभागिता हुन्छ । मेला अवधिभर सोनामाई मन्दिर क्षेत्र व्यापारी, पण्डित, साधुसन्त र दर्शनार्थीको भीडले भरिभराउ हुन्छ ।

भक्तजनको चापलाई ध्यानमा राख्दै स्थानीय प्रशासनले सुरक्षा व्यवस्था कडा पारेको छ । स्वयंसेवक तथा प्रहरी खटाइएका छन् भने स्वास्थ्य शिविर पनि सञ्चालन गरिएको छ । मन्दिर व्यवस्थापन समितिले दर्शनार्थीलाई सहज बनाउन लाइन प्रणाली र सफाइ व्यवस्थामा विशेष ध्यान दिएको छ ।