जनकपुरधाम, १४ असोज । मधेश प्रदेशको सांस्कृतिक र धार्मिक केन्द्र मानिने जनकपुरधामस्थित प्रसिद्ध राजदेवी मन्दिरमा यस वर्ष पनि महाअष्टमीको अवसरमा परम्परागत बोकाबली दिने कार्यक्रम तय भएको छ । मन्दिर व्यवस्थापन समितिका अनुसार आज साँझ ८ बजेदेखि बोकाबली औपचारिक रूपमा सुरु हुनेछ ।

समितिले यस वर्ष पनि बलि दिन चाहने भक्तजनका लागि रसिद प्रणाली अवलम्बन गरेको छ । बोकाबलीको रसिदको मूल्य ३०० रुपैयाँ तोकिएको छ । भक्तजनहरूले केही दिन अघि नै रसिद काट्ने काम सुरु भएको छ भने आज साँझसम्म निरन्तर जारी रहनेछ ।

राजदेवी मन्दिरमा प्रत्येक वर्ष हजारौँ भक्तजनको भीड लाग्ने गर्दछ । यसपटक पनि भक्तजनहरूको ठूलो चाप देखिएको छ । व्यवस्थापन समितिले भीड व्यवस्थापनका लागि स्वयंसेवक र सुरक्षाकर्मीलाई व्यापक रूपमा परिचालन गरेको छ ।

महावीर युवा कमिटीका सदस्यहरूले पुरुष र महिलालाई छुट्टाछुट्टै लाइनमार्फत दर्शन गराउने व्यवस्था मिलाइएको बताएका छन् । साथै, बोकाबली दिने भक्तजनलाई सहज वातावरण दिलाउन विशेष काउन्टरमार्फत रसिद वितरण गरिरहेको छ ।