सिरहा, १३ असोज । सिरहा नगरपालिकाले संघीय सरकारको निर्णय र परिपत्रको आधारमा अस्थायी र करार सेवामा कार्यरत कर्मचारीहरूको सेवा सम्झौता रद्द गरेको छ । सोमबारदेखि लागू हुने गरी नगरपालिकाले सूचना जारी गरेको हो ।

नगरपालिकाका प्रमुख प्रशासकीय अधिकृत पुरुषोत्तम घिमिरेका अनुसार संघीय मन्त्रिपरिषद्को असोज ५ गतेको निर्णयअनुसार संघीय, प्रदेश तथा स्थानीय तहमा स्वीकृत दरबन्दी बाहेकका अस्थायी र करार सेवामा कर्मचारी राख्न नपाउने निर्णय गरिएको थियो । सोही निर्णयलाई कार्यान्वयन गर्दै संघीय मामिला तथा सामान्य प्रशासन मन्त्रालयले असोज ८ गते र अर्थ मन्त्रालयले असोज ७ गते परिपत्र जारी गरी अस्थायी तथा करार सेवाको सम्झौता रद्द गर्न भनेको थियो ।

यस निर्णयअनुसार सिरहा नगरपालिकाले स्वीकृत दरबन्दी बाहेक कार्यरत अस्थायी कर्मचारी, करार सेवाका कर्मचारी, ज्यालादारीमा कार्यरत कर्मचारी र अन्य कर्मचारीहरूको नियुक्ति र करार सम्झौता रद्द गरेको हो ।

तर, स्थानीयवासीहरूले नगरपालिकाको यो कदमप्रति असन्तुष्टि व्यक्त गरेका छन् । विशेषगरी हिन्दू धर्मालम्बीहरूको मुख्य चाड बडादशैंको अवसरमा फूलपातिका दिनदेखि जागिरबाट कर्मचारीहरूलाई हटाइने विषयले सामाजिक सञ्जालमा तीव्र प्रतिक्रिया पाएको छ ।

स्थानीय सीबी साहले भने, ‘सरकारी घरमा मासुभात, जनताको घरमा आँसुभात कहिलेसम्म?’ उनले यसलाई गरिब र असक्षम परिवारमा प्रतिकूल असर पर्ने बताउँदै संघीय सरकारले यस विषयमा ध्यान दिनुपर्ने माग गरेका छन् ।

साहले प्रश्न उठाउँदै भनेका छन्, ‘मितव्ययीताको नाममा करार र दैनिक ज्यालादारीमा काम गरिरहेका गरिब जनताको छोराछोरीलाई चाडबाडको मुखमा जागिरबाट निकाल्नु उचित होइन । जबकि मन्त्री, प्रधानमन्त्री लगायतका उच्चतम अधिकारीहरूले आठ महिनाको काम गरेर दशैं भत्तासहित तेह्र महिनाको तलब पाउने व्यवस्था छ ।’