जनकपुरधाम, १३ असोज । धार्मिक र सांस्कृतिक दृष्टिले महत्वपूर्ण मानिने जनकपुरधाममा दशैंलाई लक्षित गर्दै प्रहरी प्रशासनले कडा सुरक्षा व्यवस्था मिलाएको दाबी गरे पनि बजारमा देखिएको वास्तविकता भने यसको पूर्णतः विपरीत देखिएको छ ।

जिल्ला प्रहरी कार्यालय धनुषाका प्रमुख प्रहरी उपरीक्षक नरहरि रेग्मीका अनुसार यस वर्ष मात्र धनुषा जिल्लामा ८०५ जना नेपाल प्रहरी र ४५० जना सशस्त्र प्रहरी खटाइएको छ । प्रहरी प्रशासनले नगरका प्रवेशद्वार, मठमन्दिर, भीडभाड हुने क्षेत्र, बजार र संवेदनशील स्थलमा सुरक्षा निगरानी बढाएको जनाएको छ । साथै, ‘छिटो प्रतिक्रिया योजना’ लागू गरिएको दाबी गर्दै शहरी क्षेत्रमा कुनै घटना भए पाँच मिनेटभित्र, ग्रामीण क्षेत्रमा १० मिनेटभित्र प्रहरी पुग्ने व्यवस्था गरिएको छ ।

प्रदेश प्रहरी कार्यालयका अनुसार आठै जिल्लामा गरी ६,५३२ जना प्रहरी परिचालन गरिएको छ । ४८ वटा क्विक रेस्पोन्स टोली, १९ वटा स्ट्राइकिङ फोर्स, ११६ स्थानमा ट्राफिकसहित चेकिङ, १२६ वटा मोबाइल गस्ती, २१२ वटा पैदल गस्ती, ३२५ वटा पिकेट गस्ती र २६ स्थानमा राजमार्ग स्कर्टिङ सञ्चालन गरिएको छ । त्यस्तै, ८६ टोली धार्मिक तथा पर्यटकीय स्थलमा, १०३ स्थानमा बैंक र वित्तीय संस्थामा र १४ स्थानमा बजार अनुगमनका लागि प्रहरी खटाइएको प्रहरी प्रशासनको दाबी छ ।

तर, जनकपुरधाम बजार क्षेत्रमा यस्ता दाबीहरू व्यवहारमा देखिन सकेका छैनन् । दशैंको भीडभाडमा प्रहरीको उपस्थिति न्यून हुँदा युवाहरू खुलेआम ट्राफिक नियम उल्लंघन गर्दै हिंडिरहेका छन् । साँझपखको भीडमा कम उमेरका युवाहरू एउटै मोटरसाइकलमा ५/६ जनासम्म सवार भई तीव्र गतिमा गाडी कुदाइरहेको दृश्य सर्वसाधारणका लागि त्रासदीपूर्ण बनेको छ । यस्तो लापरबाही नियन्त्रण गर्न प्रहरी देखिए पनि कारबाही गरेको देखिँदैन ।

दशैंको भीडभाडले भरिएको बजार क्षेत्रमा प्रहरीको उपस्थिति खोज्नै गाह्रो भएको देखिन्छ । जनकपुरधाम बजारका चोक–चोकमा प्रहरीको उपस्थिति न्यून हुँदा युवाहरू खुलेआम नियम उल्लंघन गर्दै हिंडिरहेका छन् ।

स्थानीयवासीहरूले प्रहरीको कडाइ कागजमै सीमित भएको आरोप लगाएका छन् । ‘प्रवेशद्वारमा चेकजाँचको नाममा देखिने प्रहरी बजार भित्र पसेपछि हराउँछन्,’ एक स्थानीय व्यापारीले भने, ‘दशैंमा हामीलाई सुरक्षा नभई लापरबाहीको डर बढी भएको छ ।’

प्रदेश प्रहरी प्रमुख डीआईजी उमा प्रसाद चतुर्वेदीले भने बैंक, वित्तीय संस्था र सुनचाँदी पसलजस्ता उच्च जोखिम भएका स्थानमा विशेष सुरक्षा दिइएको बताए । उनले मूल्यवृद्धि, कृत्रिम अभाव र उपभोक्ता ठगी नियन्त्रणका लागि पनि टोली खटाइएको दाबी गरे । तर, सर्वसाधारणले भने बजारभित्र देखिएको वास्तविकताले प्रहरी प्रशासनको तयारीलाई प्रश्नमाथि प्रश्न खडा गरेको बताएका छन् ।

दशैंमा सुरक्षा सुनिश्चित गर्ने भन्दै प्रहरी प्रशासनले गरेका थुप्रै दाबी र जनकपुरधाम बजारमा देखिएको वास्तविकताबीचको यो ठूला विरोधाभासले प्रहरी प्रशासनको विश्वसनीयतामाथि गम्भीर प्रश्न उठाएको छ ।