जनकपुरधाम, १३ असोज । दशैंको रौनक बढेसँगै महोत्तरी जिल्लाका विभिन्न नाकाबाट तस्करी गतिविधि तीव्र बनेको छ । सीमा सुरक्षा जिम्मेवारी पाएको सशस्त्र प्रहरी आफैं तस्करको हितैषी बनेको आरोप खुलेपछि सीमापार कारोबार नियन्त्रणको सवाल फेरि चर्चामा आएको हो ।

रघुनाथपुरस्थित सशस्त्र प्रहरी गुल्म मातहतका पोखरभिण्डा, सम्सी र खैरबन्नी नाकाबाट पछिल्ला दिनमा व्यापक तस्करी भइरहेको स्थानीय स्रोतले जनाएको छ । विशेषगरी सम्सी नाकाबाट समिरुल मिया नामका तस्करले गाईगोरु निर्बाध रूपमा पार लगाउँदै आएको देखिएको छ ।

त्यस्तै, महोत्तरीकै चर्चित तस्कर ‘कालिया’ ले गुल्मअन्तर्गतका नाका सहज बनाउन डिएसपी वीरेन्द्र खनाललाई ठूलो रकम बुझाउँदै आएको विभिन्न भिडियो प्रमाणमार्फत सार्वजनिक भएको छ । भिडियो सामाजिक सञ्जाल र स्थानीय तहमा फैलिँदै जाँदा प्रहरी संगठनकै विश्वसनीयतामा प्रश्न उठेको छ ।

सशस्त्र प्रहरी स्रोतका अनुसार पछिल्ला दिनमा महोत्तरीका एसपी शेरबहादुर अधिकारीले परम्परागत ‘घुमुवा’ प्रयोग नगरी सिधै युनिट इन्चार्जमार्फत रकम असुल गर्ने अभ्यास बढाएको आरोप समेत लागेको छ । यसरी संरचनागत ढंगले रकम उठाइने क्रम बढेपछि तस्करहरूलाई नाका पार गर्न अझ सजिलो भएको बताइन्छ ।

यद्यपि, सशस्त्र प्रहरी मुख्यालयले भने पछिल्ला वर्षहरूमा बारम्बार सर्कुलर र परिपत्रमार्फत सीमामा कडाइ गर्न निर्देशन दिँदै आएको छ । मुख्यालयले तस्करी नियन्त्रणलाई प्राथमिकता दिने दाबी गर्दै आएको भए पनि व्यवहारमा भने स्थानीय तहमा खटिएका जिम्मेवार अधिकृतहरूले त्यसलाई कार्यान्वयन नगरेको आरोप लगाइएको हो ।

स्थानीयवासी र नागरिक समाजका अगुवाहरूले सशस्त्र प्रहरीकै मिलेमतोमा दशैंको समयमा तस्करी मौलाउन थालेको भन्दै चासो देखाएका छन् । उनीहरूका अनुसार सीमामा हुने यस्तो अवैध कारोबारले राज्यको राजस्व नोक्सान गर्नुका साथै सामाजिक सुरक्षामाथि समेत खतरा निम्त्याउँछ ।

सुरक्षा निकाय स्वयं तस्करका हितैषी बनेको आरोप गम्भीर प्रकृतिको भएकाले यसमा केन्द्रीयस्तरमै छानबिन आवश्यक भएको स्थानीयले जोड दिएका छन् ।