रौतहट, १३ असोज । रौतहटको गौर कारागारबाट भागेका कैदीमध्ये १५६ जना अझै फरार रहेका छन् । प्रहरी र कारागार प्रशासनले तोकिएको म्यादभित्रै आत्मसमर्पण गरी कारागार फर्किन फरार कैदीबन्दीहरूलाई आग्रह गरेका छन् ।

जिल्ला प्रहरी कार्यालय रौतहट र गौरस्थित कारागार कार्यालयले छुट्टाछुट्टै विज्ञप्ति जारी गर्दै कैदीलाई असोज २० गतेभित्रै कारागार फर्कन सूचित गरेका हुन् । उनीहरूले कारागार व्यवस्थापन विभाग, काठमाडौंबाट प्राप्त निर्देशनअनुसार २०७६ सालको कैदीबन्दी अपराध व्यवस्थापन ऐन र कारागार ऐन बमोजिम कारबाही अघि बढाइने चेतावनीसमेत दिएका छन् ।

प्रहरी उपरीक्षक नेत्रनाथ गिरी र कारागार प्रशासक मनीष झाले संयुक्त रूपमा अपिल जारी गर्दै फरार कैदीलाई आश्रय दिने, लुकाउने वा सहयोग गर्ने व्यक्तिहरूमाथि पनि प्रचलित कानुनअनुसार कारबाही हुने चेतावनी दिएका छन् । साथै, फरार कैदीहरूको विवरण वा अवस्थाबारे जानकारी हुने परिवार, समुदाय, नागरिक समाज, सञ्चारकर्मी र व्यवसायीलाई तुरुन्त प्रहरी वा प्रशासनलाई खबर गर्न अनुरोध गरिएको छ ।

प्रहरीका अनुसार तोकिएको समयभित्र आत्मसमर्पण गर्ने कैदीलाई सहज ढंगले पुनः कारागारमा भर्ना गरिने छ । तर, ढिलाइ गर्ने वा लुकिरहेका कैदीलाई भने कानुनी दायरामा ल्याएर कारबाही गरिने एसपी गिरीले बताएका छन् ।

भदौ २४ गते कैदीहरूले जेलजीवनमा सुधारका माग राख्दै सुरु गरेको आन्दोलन उग्र बन्दै गएपछि गौर कारागारको ढोका फोडेर २९१ मध्ये २६४ जना कैदी फरार भएका थिए । अहिले कारागारमा १३५ जना मात्र छन् ।

फरारमध्ये भारतीय सीमा क्षेत्रमा पुगेका १७ जनालाई भारतीय सीमा सुरक्षा बल (एसएसबी) ले पक्राउ गरी नेपाली प्रहरीलाई बुझाएको थियो । त्यस्तै, नेपाल प्रहरी, सशस्त्र प्रहरी र नेपाली सेनाको संयुक्त टोलीले जिल्लाका विभिन्न स्थानबाट थप ९१ जना कैदीलाई पक्राउ गरी कारागारमा पुनः भर्ना गरेको थियो ।

तर, अझै पनि १५६ जना कैदी फरार रहेका छन् । प्रहरीले फरार कैदीहरूलाई खोजी कार्यलाई निरन्तरता दिइरहेको जनाएको छ ।

कारागार प्रशासन र प्रहरीको अपिलमा भनिएको छ, ‘फरार कैदी वा बन्दीहरूको अवस्थाबारे थाहा हुने जो कोहीले पनि तुरुन्तै प्रहरीलाई जानकारी गराउन अनुरोध गर्दछौं । समाज, समुदाय र नागरिक समाजको सक्रिय सहयोग बिना फरार कैदीहरूलाई नियन्त्रणमा लिन कठिनाइ हुने भएकाले सबै पक्षको सहकार्य आवश्यक छ ।’