जनकपुरधाम, १३ असोज । विजयादशमीको सप्तमी तिथिमा आइतबार मिथिलाञ्चलको सांस्कृतिक राजधानी जनकपुरधामका प्रमुख शक्तिपीठहरूमा फूलपाती भित्र्याइएको छ ।

दशैंको विशेष विधि मानिने यो परम्परा राजदेवी मन्दिरसहितका देवी मन्दिरहरूमा श्रद्धा र भक्तिभावका साथ सम्पन्न गरिएको हो ।

षष्ठी तिथिका दिन आमन्त्रित गरिएको बेल सप्तमी तिथिमा तोडेर राजदेवी मन्दिरमा भित्र्याइएपछि दशैं पर्वको धार्मिक विधि औपचारिक रूपमा प्रारम्भ भएको छ । स्थानीय परम्परा अनुसार यसलाई ‘बेल तोडी’ विधि भनिन्छ ।

यस अवसरमा राजदेवी मन्दिरमा नेपाली सेना, सशस्त्र प्रहरी र नेपाल प्रहरीले सलामी अर्पण गर्दै भगवतीको डोला निकालिएको थियो । डोलासहितको जुलुस जिल्ला समन्वय समितिको प्राङ्गणमा पुगेपछि त्यहाँ रहेको बेलको रुखबाट विधिपूर्वक बेलको फल टिपेर फूलपाती मन्दिरमा भित्र्याइएको हो ।

महन्थ राम गिरिको नेतृत्वमा निस्किएको बाजागाजा सहितको भक्तजनहरूको समूहले बेलको रुख मुनि गई हिन्दू परम्परा अनुसार पूजा अर्चना गरेको थियो । पूजा सम्पन्न भएपछि निम्त्याइएको बेलको फल टिपेर राजदेवी मन्दिरमा ल्याइएको छ ।

परम्परा अनुसार षष्ठीका दिन निम्त्याइएको बेल सप्तमीका दिन बिहान तोडी ल्याई देवीलाई अर्पण गरिन्छ । त्यसपछि विधिवत रूपमा बलि दिने परम्परा सुरु हुन्छ । स्थानीय विश्वास अनुसार सप्तमीका दिनदेखि सुरु भएको बलि दिने विधि दशैंभर निरन्तर चल्ने गर्दछ ।

धार्मिक परम्परासँग जोडिएको फूलपाती भित्र्याउने दिनलाई जनकपुरधाम र आसपासका क्षेत्रमा विशेष चहलपहलका रूपमा लिइन्छ । आजैदेखि राजदेवी मन्दिरसहित मिथिलाञ्चलका अन्य शक्तिपीठहरूमा पूजाआजा, बलि तथा धार्मिक अनुष्ठान औपचारिक रूपमा प्रारम्भ भइसकेका छन् ।

जनकपुरधाममा प्रत्येक वर्ष फूलपाती भित्र्याउने दिनलाई सांस्कृतिक एवं धार्मिक महत्वका साथ मनाइँदै आएको छ । यस दिनदेखि दशैंको रौनक अझ बढी बढ्ने जनविश्वास रहिआएको छ ।