जनकपुरधाम, १० असोज । जेनजी आन्दोलनपछि भौतिक संरचना क्षतिग्रस्त भएका मधेश प्रदेशका प्रहरी कार्यालयहरू क्रमशः पुनःस्थापना हुँदैछन् ।

विभिन्न संघसंस्था र स्थानीयको सहयोगले कार्यालय सञ्चालनमा आए पनि पोसाक र विश्राम स्थलको पूर्ण व्यवस्था हुन नसकेका कारण नियमित कामकाजमा समस्या देखिएको छ ।

मधेश प्रदेश प्रहरी कार्यालयका अनुसार आन्दोलनका क्रममा ७७ वटा प्रहरी इकाई आंशिक र १३ वटा पूर्णरूपमा क्षतिग्रस्त भएका थिए । सर्वाधिक क्षति धनुषा (२३ इकाई), सर्लाही (२०), सिरहा (१४), रौतहट (१२), पर्सा (११), सप्तरी (६), बारा (३) र महोत्तरी (१) जिल्लामा भएको थियो । कुल ८ करोड भन्दा बढी मूल्य बराबरको क्षति भएको अनुमान छ ।

आन्दोलनका क्रममा ८४ जना प्रहरी कर्मचारी घाइते भएका थिए भने ४९ वटा सवारीसाधन जलेर नष्ट भएका थिए । विस्थापित १४१ प्रहरी इकाईमध्ये हालसम्म १३६ इकाई पुनस्र्थापित भइसकेका छन् भने बाँकी ५ इकाईमा अझै काम जारी छ ।

जनकपुरधामको दुलहा–दुलहीन बस पार्क नजिक रहेको जिल्ला ट्राफिक प्रहरी कार्यालय पनि भदौ २४ गते जेनजी आन्दोलनको क्रममा विस्थापित भएको थियो । यहाँ कार्यालय, आवास, पोसाक र सवारीसाधन जलेर नष्ट भएका थिए ।

प्रदेश प्रहरी कार्यालयका अधिकारीहरूले प्रहरीहरू फर्किसके पनि कतिपय स्थानमा पोसाक र विश्राम स्थलको अझै व्यवस्था हुन नसकेको कारण कामकाजमा चुनौती देखिएको बताएका छन् । यद्यपि, अपराध अनुसन्धान, सूचना सङ्कलन, प्राकृतिक सम्पदा संरक्षण, साइबर अपराध नियन्त्रण, विपद् व्यवस्थापन र सामुदायिक सचेतना लगायतका कार्यमा प्रहरीले भूमिका निरन्तर खेलिरहेको छ ।