जनकपुरधाम, १० असोज । मधेश प्रदेश प्रहरीले बडादशैँ, तिहार र छठजस्ता चाडपर्व नजिकिँदै गर्दा सुरक्षा व्यवस्थामा कडाइ गरेको छ । प्रदेश प्रहरी कार्यालय जनकपुरधामले आठ जिल्लामा विशेष सुरक्षा योजना लागू गर्दै ६ हजार ५३२ जना प्रहरी परिचालन गरेको छ ।

प्रदेशका पर्सा, बारा, रौतहट, सर्लाही, महोत्तरी, धनुषा, सिरहा र सप्तरी जिल्लामा करिब ८ सय प्रहरी खटाइनेछ । भर्खरै सम्पन्न जेनजी आन्दोलनको प्रभाव अझै कायम रहेकाले सर्वसाधारणमा भयको वातावरण रहेको प्रदेश प्रहरी कार्यालयका प्रवक्ता एसएसपी कमल थापाले बताए । उनले भने, ‘यो अवस्थालाई चिर्न र नागरिकलाई सुरक्षाको प्रत्याभूति दिलाउन विशेष सुरक्षा योजना तयार पारिएको हो ।’

खुला सिमाना भएकाले आन्दोलनको समयमा लुटपाटमा प्रयोग भएका हतियार दुरुपयोग हुने जोखिम उच्च रहेको भन्दै एसएसपी थापाले योजनाबद्ध प्रहरी परिचालन, अनुगमन र नियन्त्रणमार्फत अपराध नियन्त्रणमा कुनै कसर बाँकी नराखिने बताए ।

विशेष सुरक्षा योजना असोज ६ गतेदेखि लागू भई छठ पर्वसम्म रहने छ । यस अनुसार प्रदेशभर ४८ वटा क्विक रेस्पोन्स टोली (क्यूआरटी), १९ वटा स्ट्राइकिङ फोर्स, ११६ स्थानमा ट्राफिकसहित चेकिङ, १२६ वटा मोबाइल गस्ती, २१२ वटा पैदल गस्ती, ३२५ वटा पिकेट गस्ती र २६ स्थानमा राजमार्ग स्कर्टिङ सञ्चालन गरिएको छ ।

त्यसैगरी ८६ वटा टोली धार्मिक तथा पर्यटकीय स्थलहरूको सुरक्षा, १०३ स्थानमा बैंक र वित्तीय संस्थाको सुरक्षा, र १४ स्थानमा बजार अनुगमनका लागि खटाइने जनाएको छ । प्रदेश प्रहरी प्रमुख डीआईजी उमा प्रसाद चतुर्वेदीले भने, ‘बैंक, वित्तीय संस्था र सुनचाँदी पसलजस्ता उच्च आर्थिक कारोबार हुने स्थानमा चोरी, लुटपाट र पाकेटमार नियन्त्रणका लागि विशेष टोली परिचालन गरिएको छ । बजारमा हुने कृत्रिम अभाव, मूल्यवृद्धि र उपभोक्ता ठगी नियन्त्रणका लागि पनि टोली खटाइएको छ।’

सदरमुकामका सहायक नाकामा सरप्राइज चेकिङ, लामो दूरी (एलआरपी) र छोटो दूरी (एसआरपी) गस्ती टोली परिचालन गरिएको छ । सार्वजनिक सवारीमा तोकिएको भन्दा बढी भाडा लिन नदिने नीति पनि लागू हुने डीआईजी चतुर्वेदीले बताए ।

यसैगरी, पटका, आतिशबाजी र अन्य विस्फोटक पदार्थको आयात, ओसारपसार र प्रयोग रोक्न, अवैध मदिरा उत्पादन–वितरण र जुवा–तात्सहितका गतिविधि नियन्त्रण गर्न जिल्ला प्रहरी कमाण्डरलाई कडा निर्देशन दिइएको छ । सीमाका संवेदनशील क्षेत्रमा विशेष टोली परिचालन गरिएको छ ।

डीआईजी चतुर्वेदीले भने, ‘दशैँमा हरेक क्षेत्र र ठाउँमा पर्याप्त संख्यामा प्रहरी खटाइएको छ । आम नागरिकले ढुक्क भएर पर्व मनाउन सकुन् भन्ने उद्देश्यका साथ यो सुरक्षा योजना लागु गरिएको हो ।’