सप्तरी, १० असोज । गत भदौ २५ मा राजविराज कारागारबाट भागेका दुई कैदी मृत भेटिएका छन् । मृतकहरूमा बलानबिहुल गाउँपालिका–४ का ५० वर्षीय तुरन्तलाल बरही र सप्तकोशी नगरपालिका–१० का ४० वर्षीय सन्तोष तामाङ रहेका छन् ।

प्रहरीका अनुसार तुरन्तलाल बरही भदौ २६ गते विष्णुपुर–६ रञ्जितपुरमा मृत अवस्थामा फेला परेका थिए । अर्का सन्तोष तामाङ भने भदौ २७ गते राजगढ–३ नर्घो पूवारीकट्टीस्थित रुखमा झुन्डिएको अवस्थामा भेटिएका छन् ।

जिल्ला प्रहरी कार्यालय सप्तरीका डीएसपी जितेन्द्र कुमार बस्नेतले प्रारम्भिक अनुसन्धानले दुवैजनाले आत्महत्या गरेको देखाएको जानकारी दिएका छन् । थप अनुसन्धान जारी रहेको उनले बताए ।

दुवै कैदी कर्तव्य ज्यान मुद्दामा सजाय भोगिरहेका थिए । भदौ २५ मा जेनजी आन्दोलनको क्रममा कारागारमा आगजनी गरेर दुई सय ५ कैदीबन्दी भागेका थिए । अहिलेसम्म १ सय ३ जना भागेका कैदी पक्राउ परेका छन् भने बाँकी कैदीहरूको खोजी जारी रहेको छ ।