जनकपुरधाम, १० असोज । जनकपुरधामस्थित राजदेवी मन्दिरमा विजयादशमीमा लाखौँ भक्तजन उपस्थित भएको अवस्थामा चोरीका घटनाहरू यस वर्ष पनि रोकिएनन् । भीडभाडका बीच महिलाले लगाएका गरगहना र पर्स चोरी हुने क्रम दोहोरिँदा श्रद्धालु असुरक्षित महसुस गरेका छन् ।

मन्दिरको दक्षिणतर्फको झ्यालमार्गबाट दर्शनको लागि लाइनमा उभिएकी एक महिलाको पर्स चोरी भएको छ । पीडित महिलाका अनुसार पर्समा करिब ९ हजार रुपैयाँ नगदसहित अन्य व्यक्तिगत सामग्री राखिएको थियो । उनले भनिन्, ‘मन्दिरमा दर्शन गर्न आएँ, तर मेरो पर्सै हरायो, त्यो पनि भिडभाडको मौका छोपेर ।’

राजदेवी मन्दिरको व्यवस्थापन महावीर युवा कमिटी मातहतमा हुँदै आएको छ । तर, पीडित महिलाले मन्दिरमा जडान गरिएको सीसीटीभी क्यामेराले चोरीसम्बन्धी दृश्य नधर्काउने, केवल पूजा–अर्चनाका दृश्य मात्र कैद हुने गरेको भन्दै समितिमाथि प्रश्न उठाएकी छन् ।

गत वर्ष आधा दर्जनभन्दा बढी महिलाका मंगलसूत्र, सुनका गरगहना र पर्स चोरी भएपछि क्यामेरा जडान गरिएको थियो । यद्यपि यस वर्ष पनि चोरी दोहोरिनुले व्यवस्थापनप्रति श्रद्धालुहरूमा शंका बढाएको छ ।

महावीर युवा कमिटीका अध्यक्ष दीपक कुमार साह मिन्टुले भने, ‘मन्दिर परिसर र आसपासका क्षेत्रमा सीसीटीभी क्यामेरा जडान गरिएको छ । तर, दशैँको दिनमा अत्यधिक भिड हुने भएकाले चोरीका घटना पूर्ण रूपमा रोक्न कठिन छ । यस्ता क्रियाकलाप गर्नेहरूलाई छिटै पक्राउ गरिन्छ ।’ उनले भक्तजनलाई पनि आफ्ना बहुमूल्य सामग्री र नगद आफैं सुरक्षित राख्न सुझाव दिए ।

स्थानीय श्रद्धालु मनोज यादवले भने, ‘दर्शन गर्न आउँदा पर्स, मोबाइल, सुनचाँदी हराउने डर हुन्छ । भक्तजनको भीड व्यवस्थापन गर्ने नाममा केवल औपचारिक काम भइरहेको देखिन्छ ।’

राजदेवी मन्दिर धार्मिक आस्था र सांस्कृतिक महत्त्व बोकेको स्थल भएकाले प्रत्येक वर्ष लाखौँ श्रद्धालु यहाँ आउने गर्छन् । तर, चाडपर्वमा चोरीका घटना दोहोरिनु सुरक्षा व्यवस्थाप्रति ठूलो प्रश्न उठाएको छ । स्थानीय श्रद्धालु र व्यापारीहरूले प्रहरीले प्रभावकारी सुरक्षा योजना लागू गर्नुपर्ने र मन्दिर व्यवस्थापनलाई समेत सचेत रहन आग्रह गरेका छन् ।