जनकपुरधाम, ९ असोज । दशैँमा जनकपुरधाममा प्रहरी प्रशासनले कडा सुरक्षा व्यवस्था अपनाएको छ ।

धार्मिक र सांस्कृतिक दृष्टिले महत्व बोकेको यस शहरमा दशैँका दिनहरूमा लाखौँ श्रद्धालु–भक्तजनको घुइँचो हुने भएकाले सुरक्षा चुनौतीलाई मध्यनजर गर्दै नेपाल प्रहरी र सशस्त्र प्रहरी संयुक्त रूपमा निगरानीमा खटिएका छन् ।

जिल्ला प्रहरी कार्यालय धनुषाका प्रमुख प्रहरी उपरीक्षक नरहरि रेग्मीका अनुसार यस वर्ष सुरक्षा व्यवस्थामा ८०५ जना नेपाल प्रहरी र ४५० जना सशस्त्र प्रहरी परिचालन गरिएको छ । यी प्रहरीलाई नगरका प्रवेशद्वार, संवेदनशील स्थान, मठमन्दिर, भीडभाड हुने बजार क्षेत्र र अन्य प्रमुख स्थानमा खटाइएको छ ।

प्रहरीले सुरक्षा चुनौतीलाई न्यूनतम पार्न चेकजाँच, गस्ती र सादा पोसाकमा प्रहरी परिचालन गरेको छ । एसपी रेग्मीका अनुसार शहरी क्षेत्रमा कुनै समस्या उत्पन्न भएमा पाँच मिनेटभित्र र ग्रामीण क्षेत्रमा १० मिनेटभित्र प्रहरी टोली पुग्ने गरी ‘छिटो प्रतिक्रिया’ योजना लागू गरिएको छ ।

जनकपुरधाममा दशैँका दिन सामान्य दिनको तुलनामा भीडभाड बढी हुने भएकाले सुरक्षा जोखिम बढ्ने आकलन गरिएको छ । प्रहरीले नगरवासीलाई शंकास्पद गतिविधि वा व्यक्तिबारे तुरुन्त जानकारी दिन आग्रह गरेको छ ।

विशेष सुरक्षा योजना अन्तर्गत राजदेवी मन्दिर लगायत अन्य शक्तिपीठमा भक्तजनको भीड व्यवस्थापन, चोरी–डकैती नियन्त्रण तथा सम्भावित दुर्घटना रोकथाम प्राथमिकतामा राखिएको छ ।

प्रहरी प्रशासनले भक्तजनको सुरक्षालाई सुनिश्चित गर्न पूर्वतयारीका साथ अभियान सञ्चालन गरिरहेको जनाएको छ ।