सिरहा, ९ असोज । सिरहाको गोलबजार नगरपालिका–१३ डङ्गराहामा १६ वर्षीय अभिषेक सिंहको अपहरणपछि हत्या प्रकरणमा नयाँ तथ्य सार्वजनिक भएको छ । असोज ५ गतेदेखि बेपत्ता अभिषेकको शव असोज ७ गते बिहान घर नजिकैको आँपको बगैँचामा भेटिएको थियो ।

प्रहरीका अनुसार अनुसन्धानक्रममा तालिमप्राप्त कुकुर मृतककै हजुरबुवा विन्देश्वर सिंहको घरको आँगनसम्म सुँघ्दै पुगेर रोकिएपछि प्रहरीको शंका मृतकका काका १७ वर्षीय पंकज सिंहतर्फ मोडिएको हो । अभिषेकले ट्र्याक्टर चलाउन नदिएको रिसमा पंकजले योजनाबद्ध रूपमा हत्या गरेको प्रहरीको प्रारम्भिक अनुसन्धानले देखाएको छ ।

पंकजले प्रहरीलाई दिएको बयानअनुसार अभिषेकलाई घरबाट ‘खेल्न जाउँ’ भनेर लगेका थिए । पहिले खेतमा खाल्डो खनी ड्रम राखिसकेका उनले मृतकको घाँटी गम्छाले बाँधेर थिचेर हत्या गरेका थिए । प्रारम्भमा शवलाई ड्रममा राखेर खाल्डोमा पुरेर माथिबाट माटोले ढाकिएको थियो ।

हत्यापश्चात् पंकजले आफन्तसँग खोजी अभियानमा संलग्न बनेको अभिनय गरेका थिए । असोज ६ गते बिहान अभिषेककी आमा रेखादेवी सिंहको मोबाइलमा इमोमार्फत पाँच करोड रुपैयाँको फिरौती माग्ने धम्कीपूर्ण सन्देश पठाएका थिए । सन्देश हिन्दी भाषामा पठाइएको थियो । यसले घटनालाई सीमापारबाट आएको जस्तो देखाउने प्रयास गरेको प्रारम्भिक निष्कर्ष प्रहरीले जनाएको छ ।

घटनाको राति भारी वर्षा भएपछि ड्रम देखिन थालेको थियो । त्यसपछि पंकज फेरि घटनास्थल गएर शवलाई आँप बगैँचामा फ्यालेको र ड्रमलाई नजिकैको पोखरीमा डुबाएको बयान दिएका छन् । घटनामा प्रयोग भएको गम्छा विद्यालय प्राङ्गणबाट, मृतकको मोबाइल र सिम पोखरी किनारबाट र ड्रम पोखरीभित्रबाट बरामद भएको प्रहरीले जनाएको छ ।

फिरौती सन्देश पठाउन प्रयोग गरिएको मोबाइल पंकजकै रहेको पुष्टि भएको छ । मोबाइल घरभित्र सुरक्षित अवस्थामा फेला परेको थियो ।

अभिषेक परिवारका एक्ला छोरा थिए । उनका पिता सञ्जय सिंहको करिब १० वर्षअघि करेन्ट लागेर मृत्यु भएको थियो । अभिषेकको नाममा चार बिघा पुख्र्यौली जमिन रहेको हुँदा सम्पत्ति हत्याउने नियतले अन्य व्यक्तिको संलग्नता हुनसक्ने आशंकामा अनुसन्धान जारी रहेको प्रहरीले जनाएको छ ।

जिल्ला प्रहरी प्रमुख तथा प्रहरी उपरीक्षक अनन्तराम शर्माले भने, ‘पंकजले घटना एक्लैले गरेको भनेका छन् । तर, ड्रममा शव लुकाउनेदेखि निकालेर फाल्ने सम्पूर्ण प्रक्रिया हेर्दा अरुको पनि संलग्नता हुनसक्छ ।’

गम्भीरताको कारण केन्द्रीय अनुसन्धान ब्युरो (सीआईबी) को टोली पनि अनुसन्धानमा खटिएको छ । प्रहरीले नाबालक पंकजलाई मोहरा बनाएर अरू कसैले योजनाबद्ध हत्या गराएको हुनसक्ने कोणबाट पनि अनुसन्धान भइरहेको बताएको छ ।

प्रहरी उपरीक्षक शर्माले भने, ‘दोषी पत्ता लागिसकेको छ । धेरै प्रमाण जुटिसकेका छन् । केही निष्कर्ष आउन बाँकी छ । निष्कर्षमा पुगेपछि सार्वजनिक गर्नेछौं ।’