रौतहट, ९ असोज । रौतहटका उखु किसानहरूले बिहीबार सरकारले उपलब्ध गराएको अनुदान रकम प्राप्त गरेका छन् । कोष तथा लेखा नियन्त्रक कार्यालय रौतहटले किसानहरूको बैंक खातामा रकम जम्मा गरेको हो ।

कोष तथा लेखा नियन्त्रक कार्यालय रौतहटका प्रमुख कोष नियन्त्रक देवी प्रसाद गौतमले भने, ‘रौतहटका ३ हजार ६ सय ४६ उखु किसानलाई कुल ३ करोड ४० लाख ३७ हजार ८ सय ८ रुपैयाँ २५ पैसा अनुदान रकम निकासा गरिएको छ । चाडपर्वको समयमा भएकोले प्राथमिकता दिइएको हो ।’

किसानहरूले प्रतिक्विन्टल ३५ रुपैयाँको दरले अनुदान प्राप्त गरेका छन् । यसअघि सरकारले गएको वर्ष उखु किसानलाई प्रतिक्विन्टल ७० रुपैयाँ दरले अनुदान दिने निर्णय गरे पनि हाल निकासा गर्दा उपलब्ध रकम अनुसार आधा मात्र वितरण भएको छ ।

रौतहटको कटहरिया नगरपालिकामा रहेको श्री बाबा बैजुनाथ सुगर एण्ड केमिकल इण्डस्ट्रि प्रालिले क्रसिङ गरेको उखुको विवरणका आधारमा कोष तथा लेखा नियन्त्रक कार्यालयले अनुदान रकम किसानको खातामा निकासा गरेको जनाएको छ ।

प्रमुख कोष नियन्त्रक गौतमले भने, ‘किसानको राहत सुनिश्चित गर्ने र चाडपर्वअघि रकम उपलब्ध गराउने हाम्रो प्राथमिकता थियो । बाँकी रकम निकासा प्रक्रियामा जाँदैछ ।’

उखु किसानहरूले अनुदान रकम पाउँदा केही राहत महसुस गरेको र आगामी समयमा बाँकी रकम पनि समयमै वितरण हुने विश्वास व्यक्त गरेका छन्