रौतहट, ९ असोज । रौतहट जिल्लामा मेडिकल पसलको आडमा प्रतिबन्धित लागुऔषध बिक्री वितरण गर्दै आएको एक व्यक्तिलाई प्रहरीले पक्राउ गरेको छ ।

जिल्ला प्रहरी कार्यालय रौतहट अन्तर्गत लागुऔषध नियन्त्रण ब्युरोको टोलीले विशेष सूचनाका आधारमा छापामारी गर्दै चन्द्रपुर नगरपालिका–७ नयाँबस्तीका ५३ वर्षीय लालबाबू (दिपेन्द्र) कुमार साहलाई नियन्त्रणमा लिएको हो ।

लागुऔषध नियन्त्रण ब्युरोका सई तुल प्रसाद पुडासैनीको कमाण्डमा खटिएको टोलीले साहको पसल र घर दुवै स्थानमा तलासी गर्दा ठूलो मात्रामा ट्रामाडोल बरामद गरेको जनाएको छ ।

प्रारम्भिक अनुसन्धानका अनुसार साहले लामो समयदेखि मेडिकल व्यवसायलाई ढाल बनाएर प्रतिबन्धित औषधि ग्राहकसम्म पुर्याउँदै आएको आशंका गरिएको छ ।

ना.३३ प ९५३३ नम्बरको मोटरसाइकल जाँच गर्दा साहको साथबाट ट्रामाडोलका ३०० पत्ता (३,००० पिस) बरामद भएको जिल्ला प्रहरी प्रवक्ता डीएसपी राजु कार्कीले जानकारी दिए ।

बरामद मोटरसाइकल, लागुऔषध र पक्राउ परेका साहलाई नियन्त्रणमा लिएर प्रहरी पोष्ट चन्द्रनगाहपुर तल्लो बजारमा राखी थप अनुसन्धान भइरहेको प्रहरीले जनाएको छ ।