सप्तरी, ९ असोज । जेनजी आन्दोलनको क्रममा भूमिसम्बन्धी संवेदनशील अभिलेख र कार्यालय संरचना सुरक्षित राख्न योगदान गर्ने व्यक्तिहरूलाई मालपोत कार्यालय सप्तरीले सम्मान गरेको छ ।

बिहीबार मालपोत कार्यालयले बडादशैंको अवसर पारेर आयोजना गरेको शुभकामना आदान–प्रदान तथा विशेष कार्यक्रममा सम्मानित व्यक्तिहरूलाई धन्यवादपत्र गरिएको हो ।

मालपोत अधिकृत अजय झाले धन्यवादपत्र हस्तान्तरण गर्दै संकटपूर्ण घडीमा भूमिसम्बन्धी कागजात जोगाउन भूमिका खेलेका व्यक्तिहरूको योगदान ‘इतिहासमा अंकित हुने काम’ भएको बताए ।

उनले भने, ‘जग्गा–जमिनसँग प्रत्यक्ष सरोकार राख्ने अभिलेख हराउने वा नष्ट हुने अवस्था सिर्जना भएको बेला तपाईंहरूकै सतर्कता र जिम्मेवारीले कार्यालय र जनताको सम्पत्ति सुरक्षित रह्यो ।’

धन्यवाद तथा सम्मान प्राप्त गर्नेहरूमा लेखापढी कानुन व्यवसायी एकाइ अध्यक्ष श्रीलाल यादव, मेमो खबर अनलाइन का सम्पादक चन्दनकुमार यादव, मुद्दाफाँट खरिदार बैंजु देव र भागवत यादव, कार्यालयका कर्मचारी पवनकुमार मेहता र विनोद यादव रहेका छन् ।

कार्यक्रममा बोल्दै लेखापढी कानुन व्यवसायी सङ्घका केन्द्रीय सदस्य जयनारायण देवले जिल्लावासीका जग्गा–जमिनसम्बन्धी महत्वपूर्ण कागजात सुरक्षित राखिनु नै ठूलो उपलब्धि भएको टिप्पणी गरे ।

उनले भने, ‘जनताको सम्पत्ति र अधिकारसँग जोडिएका अभिलेख जोगिनु भनेको भविष्यका विवाद र अन्याय रोक्न सकिनु हो । यसमा योगदान गर्ने सबैलाई आभार व्यक्त गर्दछु ।’