जनकपुरधाम, ९ असोज । मधेश प्रदेशमा फेरि सत्ता समीकरण बदलिने संकेत देखिएको छ । जनमत पार्टीका मुख्यमन्त्री सतिशकुमार सिंह अल्पमतमा पुगेपछि अब बन्ने नयाँ सरकारको नेतृत्व गर्न संघीय लोकतान्त्रिक मोर्चाले दाबी गर्ने तयारी गरेको हो ।

जनकपुरधाममा बसेको लोकतान्त्रिक मोर्चाको बैठकले सरकार गठनका लागि आवश्यक गृहकार्य अघि बढाउने र संविधानअनुसार दाबी गर्ने निर्णय गरेको हो ।

मोर्चामा जनता समाजवादी पार्टी नेपाल, लोकतान्त्रिक समाजवादी पार्टी, राष्ट्रिय मुक्ति पार्टी नेपाल, नागरिक उन्मुक्ति पार्टी, जनता प्रगतिशील पार्टी, तराई मधेश लोकतान्त्रिक पार्टी (तमलोपा) र जनमत पार्टी आबद्ध छन् ।

बैठकमा डा. सिके राउत नेतृत्वको जनमत पार्टी भने अनुपस्थित रह्यो । मुख्यमन्त्री सिंहकै पार्टी भएकाले सरकार गठनबारे निर्णायक छलफलमा जनमत पार्टी सहभागी नहुनु विशेष अर्थपूर्ण मानिएको छ ।

मोर्चामा आबद्ध अन्य दलका नेताहरूले जनमत पार्टीले यसअघि पनि निरन्तर बैठकमा भाग नलिएको र यसपटक पनि अनुपस्थित रहनुलाई राजनीतिक संकेतका रूपमा लिएको टिप्पणी गरेका छन् । यसले सरकार गठनको समीकरण कता जाने भन्ने विषयमा अनिश्चितता थपिएको छ ।

बैठकमा सहभागी एक नेताले तत्काल सरकार गठनबारे ठोस निर्णय नगरी सबै दलले आफ्ना–आफ्ना पार्टीसँग छलफल गर्ने सहमति भएको बताए । ‘अहिले तत्काल निर्णय लिने चरण छैन । सबै दलले आफ्नो पार्टीसँग छलफल गर्छन्, त्यसपछि पुनः बैठक बसेर टुंगो लगाइन्छ,’ ती नेताले भने ।

मधेश प्रदेश सभामा सम्भावित गठबन्धनमा सबै दल एकै ठाउँमा नआउने देखिएकोले सरकार गठनमा संख्यात्मक चुनौती रहने अनुमान गरिएको छ ।

राजनीतिक विश्लेषकहरूका अनुसार जनमत पार्टी सरकार गठनमा सक्रिय नभए वा तटस्थ बस्ने हो भने मोर्चाले दाबी गरेको सरकार टिकाउन कठिन पर्न सक्छ ।

बैठकमा सहभागी नेताहरूका अनुसार लोकतान्त्रिक मोर्चाभित्र रहेका सात दलबीच दीर्घकालीन राजनीतिक एकताको प्रस्ताव पनि छलफलमा आएको छ । मोर्चाको सचिवालयले प्रस्तुत गरेको प्रस्तावमा शीर्ष नेताहरूले सकारात्मक धारणा राखेका छन् ।

‘प्रदेशमा मात्र नभई राष्ट्रिय राजनीतिमा पनि वैकल्पिक शक्ति निर्माण गर्न मोर्चामा रहेका दलहरूको एकता जरुरी छ भन्ने सहमति बैठकमा भएको छ । आगामी दिनमा गृहकार्य गरेर यसबारे ठोस कदम चालिनेछ,’ एक नेताले भने ।

मुख्यमन्त्री सिंह अल्पमतमा परेको अवस्थाले मधेश प्रदेशमा नयाँ सत्ता समीकरणको द्वार खुलेको छ । तर, मोर्चाले दाबी गर्ने तयारीसँगै प्रदेश राजनीति फेरि अस्थिर मोडमा प्रवेश गरेको देखिन्छ ।

अब मधेशमा कुन दलले कस्तो रणनीति अपनाउँछ, जनमत पार्टीले कस्तो भूमिका खेल्छ र लोकतान्त्रिक मोर्चाले एकताबद्ध भएर सरकार गठन गर्न सक्छ वा सक्दैन भन्ने कुराले मात्र नयाँ सरकारको भविष्य निर्धारण गर्नेछ ।