जनकपुरधाम, ९ असोज । नेपाली कांग्रेसका महामन्त्री विश्वप्रकाश शर्माले मधेश प्रदेश सरकारको नेतृत्व अब नेपाली कांग्रेसले गर्नुपर्ने दाबी गरेका छन् ।

बिहीबार जनकपुरधाममा पत्रकारहरूसँग कुरा गर्दै शर्माले मधेशमा कांग्रेसले विगतदेखि गरेको योगदान र बलिदान स्मरण गर्दै अहिलेसम्म सरकारको नेतृत्व लिन नसक्नु विडम्बना भएको टिप्पणी गरेका हुन् ।

‘कांग्रेसलाई मजबुत अवस्थामा पुर्याउन सबैभन्दा बढी बलिदान दिने पार्टी नै मधेशको नेतृत्व गर्न सकेको छैन । अब मधेश सरकारको नेतृत्व कांग्रेसले गर्नु पर्छ,’ शर्माले भने ।

पार्टी केवल पुस्तान्तरणमा सीमित नभई सम्पूर्ण रुपान्तरणको बाटोमा अघि बढिरहेको उनले स्पष्ट पारेका छन् । शर्माले नयाँ पुस्ताले उठाएका माग सम्बोधन हुनु अनिवार्य भए पनि विगतका आन्दोलन र संघर्षबाट हासिल भएका उपलब्धीलाई संस्थागत गर्ने जिम्मेवारी कांग्रेसकै भएको बताए ।

‘जेनजी पुस्ताले उठाएको माग सम्बोधन गरिने नै हो । तर, कांग्रेस केवल पुस्तान्तरणको पक्षमा मात्र नभई सम्पूर्ण रुपान्तरणको पक्षमा छ । हामी नयाँ पुस्ताको भावना र अपेक्षासँगै पुराना पुस्ताले गरेको बलिदान र संघर्षलाई संस्थागत गर्दै अघि बढ्छौं,’ शर्माले भने ।

महामन्त्री शर्माले कांग्रेसलाई समयसापेक्ष बनाउन पार्टीभित्र निरन्तर संवाद, सहकार्य र नवीनीकरण अपरिहार्य भएको उल्लेख गरे । उनका अनुसार रुपान्तरणको प्रक्रिया कुनै एक पुस्तासम्म सीमित नभई सबै पुस्ताको संयुक्त प्रयत्नमा मात्र सम्भव छ ।

हालै जेनजी पुस्ताले सार्वजनिक रूपमा उठाएका मागपछि कांग्रेस नेतृत्व तहमा पुस्तान्तरण र रुपान्तरणबारे छलफल तीव्र बनेको छ । पार्टीभित्र नेतृत्वको पुस्ता परिवर्तन मात्र गर्ने वा संरचना, विचार र कार्यशैलीमै व्यापक सुधार गर्ने भन्ने बहस भइरहेका बेला शर्माको अभिव्यक्तिलाई महत्वपूर्ण मानिएको छ ।