रौतहट, ८ असोज । जिल्ला वन कार्यालय रौतहटको गस्ती टोलीले ठूलो मात्रामा अवैध सालका काठ बरामद गरेको छ ।

डिभिजन वन कार्यालय प्रमुख हेमन्त कुमार साहको नेतृत्वमा धनसर सब–डिभिजन वन कार्यालयसँगको संयुक्त टोलीले मंगलबार राति विशेष सर्च अपरेसन सञ्चालन गरी बोलेरो गाडीमा लोड गरिएको सालको गोलिया नियन्त्रणमा लिएको हो ।

वन कार्यालयका अनुसार लमहा पुलदेखि पश्चिमतर्फको लक्का (कजवे) हुँदै उत्तरतर्फको जंगलमा तस्करहरूले सालका रुख काटेर बोलेरो गाडीमा गोलिया लोड गरिरहेका बेला टोली पुगेको थियो । ना. ४ च. ४६६६१ नम्बरको महिन्द्रा बोलेरो गाडी रोकेर जाँच गर्दा ७ थान गोलिया, करिब २५ क्यूफिट सालको काठ भेटिएको हो ।

गस्ती टोली देख्नेबित्तिकै तस्करहरू काठ र गाडी छाडेर फरार भएका थिए । बरामद काठ र गाडीलाई अनुसन्धानका लागि वन कार्यालय ल्याइएको डिभिजन प्रमुख साहले जानकारी दिए । उनले अवैध कटानीविरुद्ध कारबाही कडा पारिएको बताउँदै काठ तस्करीमा संलग्नलाई कानूनी दायरामा ल्याइने चेतावनी दिए ।

स्थानीयवासीका अनुसार पछिल्ला महिनामा यस क्षेत्रका जंगलमा सालका रुख अवैध रूपमा काट्ने गतिविधि बढेको छ । तस्करहरूले राति समूह बनाएर रुख काट्ने र गाडीमार्फत भारततर्फ तस्करी गर्ने गरेको उनीहरूको आरोप छ ।

वन कार्यालयले यस्ता गतिविधि नियन्त्रण गर्न गस्तीलाई थप सक्रिय बनाएको छ । साथै, स्थानीयको सहयोग बिना काठ तस्करी नियन्त्रण कठिन हुने भन्दै सामुदायिक सतर्कता आवश्यक रहेको चेतावनी दिएको छ ।