जनकपुरधाम, ८ असोज । मधेश प्रदेश प्रहरी कार्यालय जनकपुरधामले एक सूचना जारी गर्दै चोरीका गहना र अन्य सामग्रीहरू बिना बिलबिजक किनबेच नगर्न सर्वसाधारणलाई आग्रह गरेको छ ।

प्रहरीका अनुसार भदौ २३ र २४ गते मधेश प्रदेशका विभिन्न स्थानहरूमा भएको प्रदर्शनका क्रममा तोडफोड, आगजनी र लुटपाटका घटनाहरूमा संलग्न व्यक्तिहरूले चोरीका सामग्रीहरू बजारमा बिक्री गर्न सक्ने आशंका गरिएको छ ।

प्रहरीको अनुसार जनकपुरधामलगायतका क्षेत्रमा भएका उग्र आन्दोलनको क्रममा सरकारी तथा निजी सम्पत्तिहरूमा व्यापक क्षति पुर्याइएको थियो । प्रहरी प्रमुख डिआइजी उमा प्रसाद चतुर्वेदीले बताएअनुसार विभिन्न प्रतिष्ठान, बैंक, वित्तीय संस्था तथा अन्य कार्यालयहरूबाट महत्वपूर्ण कागजात, ऐतिहासिक दस्तावेज, बहुमूल्य गरगहना, नगद रकम र अन्य जिन्सी सामग्रीहरू लुटिएको सूचना प्रहरीलाई प्राप्त भएको छ ।

प्रहरीले सार्वजनिक गरेको सूचनामा भनिएको छ, ‘तोडफोड र लुटपाटमा संलग्न व्यक्तिहरूले चोरीका सामग्रीहरू लुकाइछिपाइ अवैध रूपमा किनबेच गर्न सक्ने सम्भावना उच्च रहेको छ । यस्तो अवस्थामा कुनै पनि व्यक्ति वा व्यवसायीले बिलबिनाको गरगहना वा अन्य सामग्री खरिद गरेमा उनीहरू कानुनी कारबाहीको दायरामा पर्नेछन् ।’

साथै, प्रहरीले आधिकारिक बिक्रेताबाट प्रमाणित बिलसहित मात्र सामान खरिद गर्न आग्रह गरेको छ । कुनै पनि शंकास्पद वस्तु किनबेच गर्नु मुलुकी अपराध संहिता अन्तर्गत गम्भीर दण्डयोग्य अपराध मानिन्छ ।

प्रहरीले सर्वसाधारणलाई कुनै पनि शंकास्पद गतिविधि देखिएमा वा चोरीमा संलग्न व्यक्तिबारे जानकारी भएमा नजिकको प्रहरी कार्यालय वा टोल फ्री नम्बर १०० मा तुरुन्त सम्पर्क गर्न अनुरोध गरेको छ ।