जनकपुरधाम, ८ असोज । लोकतान्त्रिक समाजवादी पार्टी (लोसपा) नेपालका मधेश प्रदेशसभा सदस्य जितेन्द्र सोनलले प्रधानमन्त्री सुशिला कार्कीको अभिव्यक्तिप्रति आपत्ति जनाएका छन् ।

बुधबार बसेको मधेस प्रदेशसभाको बैठकको विशेष समयमा बोल्दै उनले समावेशिताको सवालमा मधेशी समुदायलाई सम्बोधन नगरेको भन्दै प्रधानमन्त्रीको मन्तव्यप्रति असन्तुष्टि व्यक्त गरेका हुन् ।

सोनलले कार्कीले केही दिनअघि दिएको एउटा टेलिभिजन अन्तरवार्ताको सन्दर्भ उठाउँदै भने, ‘राष्ट्र प्रमुखको हैसियतमा जब उहाँले संविधान, समावेशिता, प्रतिनिधित्वको कुरा गर्नुहुन्छ, तब तमाम जातजातिको नाम लिन्छन्, तर मधेसी शब्द उच्चारण नहुनु अचम्मको कुरा हो । चेतनामा मधेश अझै परिधिमा परेको देखिन्छ ।’

उनले मधेशी समुदायलाई राज्यले स्वीकार नगरेको अनुभूति हुने किसिमको व्यवहार राष्ट्रप्रमुखबाटै भएको भन्दै चिन्ता व्यक्त गरे । ‘यो हामी मधेशीहरूका लागि केवल भाषिक त्रुटि मात्र नभई चेतनात्मक बेवास्ताको संकेत हो,’ सोनलले भने ।

सोनलले कुनै पनि जातजातिको अस्तित्वलाई बेवास्ता गर्ने अधिकार राज्य वा नेताहरूलाई नभएको स्पष्ट पारे । लोकतान्त्रिक मूल्यमा सबै नागरिकको समान अस्तित्व र सहभागिता सुनिश्चित हुनुपर्ने भन्दै उनले भने, ‘यदि कुनै जातिको नाम बारम्बार छुटाइन्छ भने त्यो केवल लापरवाही होइन, सोचाइको गम्भीर समस्या हो ।’

उनले मधेश प्रदेशलाई संघीयता र समावेशिताको ‘जननी’ को संज्ञा दिँदै राज्य संरचनामा सबै समुदायको सहभागिता र अधिकार सुनिश्चित गर्ने आन्दोलनमा मधेशको ऐतिहासिक योगदान स्मरण गराए ।

प्रदेशसभा सदस्य सोनलले मुख्यमन्त्री सतिशकुमार सिंहप्रति पनि असन्तुष्टि व्यक्त गरे । उनले पार्टीले सरकारबाट फिर्ता बोलाइसकेको अवस्थामा समेत सिंहले पदमा टिकिरहनु अटेरी भएको बताए ।

‘पार्टी निर्णयको पालना नगर्ने प्रवृत्तिले संसदीय प्रणालीमा संकट उत्पन्न गर्छ,’ उनले भने, ‘मुख्यमन्त्रीले मार्ग प्रसस्त गर्दै पदबाट हट्नुपर्छ । प्रदेशसभा कुनै व्यक्तिको खेलौना होइन । हामी सबै दलीय जिम्मेवारी र अनुशासनभित्र रहनुपर्छ ।’

मुलुकको हालको राजनीतिक अस्थिरता र संवैधानिक व्यवस्थामा भइरहेको चलखेलप्रति चिन्ता व्यक्त गर्दै सोनलले संघीयता र समावेशिताको रक्षा गर्न मधेशवासीलाई अझ बढी सचेत र जिम्मेवार बन्न आह्वान गरे ।

‘हामीले संघीयता र अधिकारका लागि ठूलो संघर्ष गर्यौं । अब त्यसको रक्षा र सुदृढीकरणको जिम्मेवारी पनि हामीमाथि नै आएको छ,’ उनले भने ।