रौतहट, ७ असोज । माधवनारायण नगरपालिकाले बाढी प्रभावित घरपरिवारका कृषकहरूको कृषि पुनस्र्थापना र सहनशीलता प्रवर्धनका लागि पम्पसेट र सिँचाइ सामग्री वितरण गरेको छ ।

नगरपालिकाका वडा नं. ८ र ९ का कुल ५० जना कृषकलाई सो कार्यक्रम अन्तर्गत सिँचाइ सामग्री उपलब्ध गराइएको नगर प्रमुख बैजनाथ प्रसाद यादवले जानकारी दिए ।

परियोजनाका कृषि अधिकृत बिबेक रौनियारका अनुसार वडा नं. ८ मा ३२ जना कृषक र वडा नं. ९ मा १८ जना कृषकलाई पम्पसेट र डेलिभरी पाइप वितरण गरिएको छ । सो पम्पसेट सञ्चालनका लागि आवश्यक बोरिङ्ग यसअघि नै जडान भइसकेको छ ।

नगरपालिकाका कृषि शाखा अधिकृत अनुजकुमार झाका अनुसार वडा नं. ८ मा १६ वटा कृषक समूह र वडा नं. ९ मा ६ वटा कृषक समूह रहेका छन् । प्रत्येक समूहलाई आवश्यक सिँचाइ सामग्री वितरण गर्न वडा नं. ८ मा समूहप्रति २ जना र वडा नं. ९ मा समूहप्रति ३ जना कृषकलाई पम्पसेट उपलब्ध गराउने निर्णय गरिएको छ ।

नगरपालिकाले यस पहलमार्फत कृषकहरूलाई बाढीका कारण क्षतिग्रस्त भएको खेती पुनःस्थापना गर्न सहयोग पुर्याउने उद्देश्य राखेको छ। साथै कृषकको सहनशीलता र उत्पादन क्षमता बढाउन आवश्यक सिँचाइ व्यवस्थापनमा ध्यान दिएको नगर प्रमुख यादवले बताए ।