सप्तरी, ७ असोज । सप्तरीको सुरुङ्गा नगरपालिकामा पोखरीमा डुबेर दुई बालिकाको ज्यान गएको छ । वडा नं. २ स्थित हर्दिया घरकी ७ वर्षीया सुस्तिका चौधरी र ११ वर्षीया आशकी चौधरी पोखरीमा नुहाउँदा डुबेर मृत्यु भएकी हुन् ।

स्थानीय प्रहरीले जानकारी दिएको अनुसार दुबै बालिका सोमबार साँझ स्थानीय अरविन्द चौधरीको पोखरीमा नुहाउन गएकी थिइन् । उनीहरूसँगै नुहाउन गएकी ८ वर्षीया प्रियान्सु चौधरी भने जीवित बचेकी छन् ।

स्थानीयवासीको सहयोगमा उनलाई तत्काल उद्धार गरिएको थियो । तर, सुस्तिका र आशकीलाई जिवितै निकाल्न सम्भव भएन । मृतक बालिकाहरूको शव पोष्टमार्टमका लागि अस्पताल पठाइएको छ । घटना सम्बन्धमा थप अनुसन्धान जारी रहेको प्रहरीले जनाएको छ ।

सुरुङ्गा नगरपालिकाका प्रतिनिधिहरूले परिवारसँग सम्पर्क गरी आवश्यक सहयोगको आश्वासन दिएका छन् ।