जनकपुरधाम, ७ असोज । जेनजी आन्दोलनका क्रममा तोडफोड र आगजनीबाट क्षति पुगेको जनकपुर भन्सार कार्यालय पूर्णरुपमा सञ्चालनमा आएको छ ।

कार्यालयका सूचना अधिकारी राजकुमार अवाले भन्सार कार्यालयअन्तर्गतका सबै साना कार्यालयहरू र सेवाहरू पुनः सक्रिय भएको बताए ।

अवाका अनुसार कार्यालयअन्तर्गतका भडरिया छोटी भन्सार, इनरुवा छोटी भन्सार र जटही छोटी भन्सार कार्यालयमा भन्सार जाँचपास र अन्य नियमित कामहरू सुरु भइसकेका छन् । साथै, असोज ५ गतेदेखि मुद्दा सम्बन्धी प्रशासनिक कामहरू समेत पुनः सञ्चालनमा आएको छ ।

जेनजी प्रदर्शनका क्रममा कार्यालयमा १३ करोड ८७ लाख ५० हजार रुपैयाँ बराबरको क्षति भएको थियो । क्षतिपूर्ति र पुनःस्थापनाका लागि सरकारले तत्कालै आवश्यक व्यवस्थाहरू अघि बढाएको थियो ।

अब कार्यालयले पहिलेझैँ आयात–निर्यात, भन्सार शुल्क र प्रशासनिक कामहरू नियमित रूपमा सञ्चालन गरिरहेको सूचना अधिकारी अवाले बताए ।