पर्सा, ७ असोज । जेनजी आन्दोलनका क्रममा वीरगंजमा भएको आगजनीमा परेर घाइते भएकी एक महिलाको उपचारका क्रममा मृत्यु भएको छ ।

पर्सा जिल्लाको सखुवाप्रसौनी गाउँपालिका–२ निवासी ४५ वर्षीया शोशिला देवी हजराको सोमबार काठमाडौंस्थित कीर्तिपुर बर्न अस्पतालमा मृत्यु भएको पर्सा प्रहरीका प्रवक्ता प्रहरी नायब उपरीक्षक किशोर लम्सालले जानकारी दिए ।

घटनामा घाइते दुईमध्ये हजराको शरीरको करिब ५० प्रतिशत भाग जलेको थियो । उनलाई तत्काल वीरगंजस्थित नेशनल मेडिकल कलेजमा भर्ना गरिएको थियो । प्रारम्भिक उपचारपछि अवस्था गम्भीर भएपछि उनलाई थप उपचारका लागि काठमाडौँको बर्न अस्पताल पठाइएको थियो ।

उक्त आगजनीमा घाइते भारत बिहारका १८ वर्षीय विनय यादवको शरीरको ९० प्रतिशत भाग जलेको थियो । प्रहरीले जनाएअनुसार उनको अवस्था अहिले सुधार हुँदै गएको छ ।

शोशिला देवी हजराको मृत्युसँगै पर्सा प्रहरीले घटनाको थप अनुसन्धान गरिरहेको छ । मृतकको परिवारलाई राहत स्वरूप सखुवाप्रसौनी गाउँपालिकाले एक लाख रुपैयाँ क्षतिपूर्ति उपलब्ध गराउने निर्णय गरेको छ । गाउँपालिका अध्यक्ष यसवन्त यादवले परिवारलाई सहयोग पुर्याउने प्रतिबद्धता व्यक्त गरेका छन् ।