सप्तरी, ७ असोज । जेनजीले भदौ २४ मा गरेको प्रदर्शन हिंसात्मक बनेपछि सप्तरी जिल्लाका विभिन्न सुरक्षा निकायका कार्यालयमा लाखौं रुपैयाँ बराबरको क्षति भएको छ ।

प्रदर्शनका क्रममा प्रहरी कार्यालय, युनिट तथा अदालतको सुरक्षा इकाईमा तोडफोड र आगजनी भएको जिल्ला प्रहरी कार्यालय सप्तरीले जनाएको छ ।

प्रहरी नायव उपरीक्षक जितेन्द्र कुमार बस्नेतका अनुसार इलाका प्रहरी कार्यालय कल्याणपुरमा करिब एक लाख, इलाका प्रहरी कार्यालय बोदेबर्साइनमा १२ लाख, प्रहरी चौकी मौवहामा ३५ हजार, जिल्ला अदालत समन्वय तथा सुरक्षा प्रहरी युनिटमा १५ लाख र उच्च अदालत जनकपुर राजविराज इजलाशको सुरक्षा गार्ड युनिटमा ३५ हजार गरी कुल ३१ लाख ८५ हजार रुपैयाँ बराबरको क्षति भएको छ ।

सबैभन्दा बढी क्षति इलाका प्रहरी कार्यालय बोदेबर्साइन र जिल्ला अदालत सुरक्षा युनिटमा भएको प्रहरीले जनाएको छ । जिल्ला अदालतमा प्रहरी पोशाक, विस्तरा, बन्दोबस्तीका अन्य सामान तथा चार वटा मोटरसाइकल जलेर नष्ट भएका छन् ।

प्रहरीका अनुसार नष्ट भएका कार्यालय र युनिटहरूको पुनःस्थापनाका लागि काम तीव्र गतिमा अघि बढाइएको छ । साथै जिल्लाभरका प्रहरी इकाईमा सुरक्षा व्यवस्थाका लागि थप सतर्कता अपनाइएको छ ।

जिल्ला प्रहरी कार्यालय सप्तरीले स्थानीय बासिन्दालाई समेत सचेत गराउँदै यस्तो प्रदर्शनले सार्वजनिक सम्पत्ति र सुरक्षा संरचनामा क्षति पुग्ने हुँदा कानूनको दायराभित्र रहँदै विरोध गर्नुपर्ने चेतावनी दिएको छ ।