जनकपुरधाम, ७ असोज । जनकपुरधाम उपमहानगरपालिकाका कर्मचारीहरूले उपमेयर किशोरी साहले अभद्र व्यवहार गरेको आरोप लगाउँदै मंगलबार पेन डाउन गर्दै कार्यालय बन्द गरेका छन् ।

सोमबार घटस्थापनाको दिन कलश यात्रापछि कार्यालय परिसरमा आराम गरिरहेका कर्मचारीलाई साहले मदिरा सेवन गरी गालीगलौज गरेको भन्दै उनीहरू आक्रोशित बनेका हुन् ।

भण्डारण महाशाखाका प्रमुख गणेश यादवका अनुसार उपमेयर साहले आफूलाई आवश्यक सम्मान नदिएको र आदेश नमान्ने गरेको भन्दै कर्मचारीलाई जथाभावी गाली गर्न थाले । यादवले भने, ‘अनुचित व्यवहारको विरोध गर्दा साह अझ उग्र बनेर कुर्सी उठाई हिर्काउन खोजे ।’

कर्मचारीहरूले उपमेयर साहले मेयर मनोजकुमार साहलाई समेत अपशब्द प्रयोग गरेको आरोप लगाएका छन् । यस घटनाले उपमहानगरभित्रको कार्य वातावरण थप अस्वस्थ बनेको कर्मचारीहरूको भनाइ छ ।

घटनापछि भेला भएका कर्मचारीहरूले आपसी छलफल गर्दै उपमेयर साहविरुद्ध सार्वजनिक अपराध मुद्दा दायर गर्ने निर्णय गरेका छन् । यादवले भने, ‘कर्मचारीहरूको सुरक्षा र सम्मानसँग सम्झौता गर्न सकिँदैन, त्यसैले कानूनी बाटो अवलम्बन गर्ने निर्णयमा पुगेका छौँ ।’

पेन डाउनका कारण मंगलबार उपमहानगरपालिकाको दैनिक सेवा ठप्पजस्तै भएको थियो । बिहानैदेखि सेवाग्राहीहरू कार्यालय धाएका थिए । तर, अधिकांश काम रोकिएकोले निराश बनेर फर्किनुपरेको थियो ।

कर्मचारीहरूले सामूहिक विरोध गर्दै यस्ता घटनाले कार्यसंस्कृति नष्ट गर्ने चेतावनी दिएका छन् । उनीहरूले दोषीमाथि तत्काल कारबाही नभए अझ कडा आन्दोलन गर्ने चेतावनीसमेत दिएका छन् ।