सिरहा, ६ असोज । चालु आर्थिक वर्ष सुरु भएको दुई महिनाभन्दा बढी समय बितिसक्दा पनि सिरहाका आधा दर्जन पालिकाले बैंक खाता सञ्चालनमा ल्याउन सकेका छैनन् । आवश्यक कानुनी प्रक्रिया पूरा हुन नसक्दा ती पालिकामा आर्थिक कामकाज प्रभावित भएको छ ।

कोष तथा लेखा नियन्त्रक कार्यालय सिरहाका सूचना अधिकारी दीपेशकुमार शर्माका अनुसार जिल्लाका १७ मध्ये ११ पालिकाको बैंक खाता सञ्चालनमा आइसकेको छ भने बाँकी ६ वटा पालिकाको खाता अझै सञ्चालनमा आएको छैन । खाता सञ्चालनमा नआएका पालिकाहरूमा धनगढीमाई, सुखीपुर, सिरहा नगरपालिका, भगवानपुर, बिष्णुपुर र बरियारपट्टी गाउँपालिका पर्दछन् ।

शर्माका अनुसार बैंक खाता सञ्चालनका लागि पालिकाले चालु आर्थिक वर्षको नीति, कार्यक्रम र बजेट नगर वा गाउँसभाबाट पारित गरी कार्यालयमा बुझाउनुपर्छ । साथै, पालिका प्रमुखले प्रमुख प्रशासकीय अधिकृतलाई आर्थिक अधिकार नदिएसम्म खाता सञ्चालन गर्न पाइँदैन ।

सङ्घीय र प्रदेश सरकारबाट प्राप्त स्रोत खर्च गर्दा समेत कानुनी प्रक्रिया पूरा गर्नु आवश्यक छ । बैंक खाता सञ्चालनमा नआएका कारण ती पालिकामा कर्मचारी तलब, भत्ता, विकास निर्माण कार्य र अन्य आर्थिक गतिविधि प्रभावित भएका छन् ।

हालसम्म खाता सञ्चालनमा आइसकेका ११ पालिकामा सखुवानन्कारकट्टी, नवराजपुर, लक्ष्मीपुर पतारी, अर्नमा, औरही, नरहा गाउँपालिका, साथै लहान, गोलबजार, कल्याणपुर, कर्जन्हा र मिर्चैया नगरपालिका रहेका छन् ।