सर्लाही, ६ असोज । सर्लाही जिल्लामा जेनजी आन्दोलनको क्रममा व्यापक क्षति भएको छ । जिल्ला प्रशासन कार्यालय सर्लाहीले सार्वजनिक गरेको विवरणअनुसार जिल्लामा ६३ करोड ५५ लाख रुपैयाँ बराबरको नोक्सानी भएको हो ।

जिल्लाभरि भएको क्षतिको वर्गीकरण अनुसार ६ वटा पूर्ण क्षति, ४ वटा आंशिक क्षति र ७ वटा सामान्य क्षति देखिएको छ । यसका साथै सार्वजनिक सेवामा समेत असर परेको पाइएको छ । हाल जिल्लाभरि ७२ वटा कार्यालय पूर्ण रूपमा सञ्चालनमा छन् भने ६ वटा कार्यालय आंशिक रूपमा सञ्चालनमा रहेका छन् ।

सहायक प्रमुख जिल्ला अधिकारी शिव हरि पोखरेलले भने, ‘आन्दोलनका क्रममा व्यक्तिगत तथा निजी सम्पत्तिमा परेको क्षतिको विस्तृत विवरण संकलन भइरहेको छ । प्राप्त भइसकेपछि सार्वजनिक गरिनेछ ।’

प्रशासनले प्रभावित क्षेत्रहरूको तत्काल पुनर्निर्माण र सेवा सञ्चालन पुनःसुरु गर्ने तयारी गरिरहेको छ भने स्थानीय समुदायमा समेत क्षतिको समीक्षा र राहत वितरणको प्रक्रिया अगाडि बढाउने योजना बनाइरहेको छ ।