बारा, ६ असोज । बाराको जितपुरसिमरा उपमहानगरपालिका–२१ स्थित अमलेखगंजमा प्रहरीले सोमबार दिउँसो ठूलो परिमाणमा लागूऔषध गाँजा बरामद गरेको छ ।

इलाका प्रहरी कार्यालय अमलेखगंजअगाडि रहेको चेकपोइन्टमा करिब १ बजे मिनि ट्रक बा २ ख ९५६९ नम्बरबाट २३६ किलो ७५० ग्राम गाँजा बरामद गरिएको हो ।

प्रहरीका अनुसार ट्रकको छतमा विशेष फल्स बटम बनाइएको थियो र त्यसलाई त्रिपालले ढाकेर लुकाइएको अवस्थामा २८ पोका गाँजा प्लास्टिकमा प्याक गरी राखिएको थियो । बरामद ट्रक मकवानपुरबाट वीरगंजतर्फ जाँदै गरेको अवस्थामा रोकि जाँच गरिएको थियो ।

चेकजाँच प्रहरी नायब निरीक्षक धन प्रसाद श्रेष्ठको कमाण्डमा खटिएको टोलीले गरेको हो । यस क्रममा मकवानपुर कैलाश गाउँपालिका–१० निवासी ३८ वर्षीय रमेश रुम्बा (सानुलाल रुम्बाको छोरा) लाई गाँजा ओसारपसारमा संलग्न रहेको आरोपमा नियन्त्रणमा लिइएको छ ।

प्रहरीका अनुसार पक्राउ परेका व्यक्ति, बरामद मिनि ट्रक र गाँजा इलाका प्रहरी कार्यालय अमलेखगंजमा राखेर आवश्यक अनुसन्धान अघि बढाइएको छ ।