पर्सा, ६ असोज । वीरगंज नाका हुँदै चालु आर्थिक वर्षको पहिलो दुई महिनामा करिब एक खर्ब ४६ अर्ब ६४ करोड मूल्य बराबरका वस्तु तथा सामान भित्रिएका छन् ।

यो गत आर्थिक वर्षको समान अवधिको तुलनामा करिब २० प्रतिशत बढी हो । गत आवको दुई महिनामा एक खर्ब २२ अर्ब ३२ करोड मूल्य बराबरको सामान भित्रिएको थियो ।

वीरगंज भन्सार कार्यालयका प्रमुख भन्सार प्रशासक विष्णुप्रसाद ज्ञवालीका अनुसार चालु आवमा आयात र निर्यात दुवैमा उल्लेखनीय वृद्धि देखिएको छ । उनले भने, ‘गत आवको दुई महिनाको तुलनामा चालु आवमा करिब २४ अर्ब ३२ करोड बढी सामान भित्रिएका छन् । आयात मात्रै नभई राजस्व सङ्कलनमा समेत वृद्धि भएको छ ।’

भन्सार कार्यालयको तथ्यांकअनुसार चालु आवको दुई महिनामा निर्यातमा पनि ठूलो सुधार आएको छ । गत आवको दुई महिनामा ६ अर्ब ५ करोड मूल्य बराबरको सामान विदेशतर्फ निर्यात भएको थियो भने चालु आवको दुई महिनामा यो मूल्य १७ अर्ब ३ करोड पुगेको छ । यसले देखाउँछ कि गत आवको तुलनामा निर्यातमा करिब १० अर्ब ९८ करोड बढीको वृद्धि भएको छ ।