जनकपुरधाम, ६ असोज । तोडफोड र आगजनीबाट ध्वस्त बनेको मधेश प्रदेश सभाको भवन मर्मत भएपछि मंगलबार दिउँसो १ बजे प्रदेश सभाको बैठक बस्ने भएको छ । आवश्यक तयारी अन्तिम चरणमा पुगेको प्रदेश सभा सचिवालयले जानकारी दिएको छ ।

युवा पुस्ताको आन्दोलनका क्रममा आन्दोलनकारीले प्रदेश सभा भवनमा आगजनी र तोडफोड गरेका थिए । त्यसपछि बैठक स्थगित भएको थियो । तर, मर्मत सम्भार पूरा भएपछि मंगलबार पुनः बैठक सञ्चालन हुन लागेको हो । प्रदेश सभाका सचिव वाशु कोइरालाका अनुसार सभा हलमा कुर्सी व्यवस्थापनदेखि अन्य भौतिक तयारी बिहानसम्म पूरा गर्ने कार्य भइरहेको छ । उनले भने, ‘अहिले केही साना काम बाँकी छन्, ती सकाएर हल व्यवस्थित बनाइन्छ ।’

प्रदेश सभाको मंगलबारको बैठकलाई राजनीतिक दृष्टिले समेत महत्वपूर्ण मानिएको छ । जनमत पार्टीले सरकारलाई दिएको समर्थन फिर्ता लिएकाले सत्तारूढ समीकरण फेरिएको छ । सभामुख रामचन्द्र मण्डलले जनमत पार्टीले सोमबार बिहान लिखित पत्रमार्फत समर्थन फिर्ता लिएको जानकारी दिएको पुष्टि गर्दै त्यसअनुसार सभामा सिट व्यवस्थापन मिलाइने बताए ।

जनमत पार्टीको समर्थन फिर्ता भएपछि मधेश सरकार संकटमा परेको छ । मुख्यमन्त्री सतिश कुमार सिंहले राजीनामा नदिने बरु प्रदेश सभाबाट विश्वासको मत लिने अडान लिएका छन् । यही कारण पार्टीले उनलाई स्पष्टिकरण सोध्दै कारबाही प्रक्रियासमेत अघि बढाएको छ ।

एकातिर आगजनीपछि पहिलोपटक प्रदेश सभा हल पुनः सञ्चालन हुँदैछ भने अर्कोतर्फ समर्थन फिर्ता लिएपछि सरकार बहुमतमा रहने–नरहने विषयमा चासो बढेको छ ।