जनकपुरधाम, ६ असोज । नेपाल रेल्वे कम्पनीले यात्रुवाहक रेल्वे मात्र नचलाई अब कार्गो रेल्वे सेवासमेत सञ्चालन गर्ने तयारी गरेको छ । व्यवसायिक तथा नाफामूलक बन्ने रणनीतिक योजनाअन्तर्गत कम्पनीले मालसमान ढुवानी सेवा सुरु गर्ने प्रक्रिया अघि बढाएको हो ।

हाल भारतको जयनगरदेखि जनकपुरधाम हुँदै महोत्तरीको बिजलपुरासम्म सञ्चालनमा रहेको ६५ किलोमिटर लामो ब्रोडगेज यात्रुवाहक रेल्वेमार्फत दुवै देशका नागरिक आवतजावत गर्दै आएका छन् । भारत सरकारको करिब १० अर्ब रुपैयाँ लागतमा बनेको उक्त रेल्वे सेवामा नेपालले दुईवटा इन्जिन र चार–चार वटा वोगी खरिद गरी सञ्चालनमा ल्याएको छ ।

यात्रु ओसारपसार मात्रबाट कम्पनीलाई नाफामा लैजान कठिन भएकाले कार्गो सेवाको विकल्प अघि सारिएको नेपाल रेल्वे कम्पनीका प्रबन्ध निर्देशक निरञ्जन झाले बताए । ‘पटक–पटक सरकारले ट्रे«डरेल सञ्चालन गर्न पहल गरिरहेको छ । अब कार्गो रेल्वे सेवा निकट भविष्यमै सञ्चालन हुनेछ,’ उनले भने ।

कम्पनीले कार्गो सेवा सञ्चालनका लागि हाल सञ्चालनमा रहेका वोगीमा थप गर्ने वा नयाँ मालवाहक रेल नै थप्ने विषयमा भारतीय पक्षसँग छलफल गरिरहेको छ । यसका लागि महोत्तरीको रामनगर र बर्दिवाससम्म रेल्वे विस्तार गरी नयाँ स्टेशन निर्माण गर्ने काम भारतीय पक्षले अघि सारेको झल्काइएको छ ।

नेपालका व्यवसायी भने वर्षौंदेखि कार्गो रेल्वे सेवाको माग गर्दै आएका छन् । उनीहरूको भनाइमा यसले व्यापारिक ढुवानीमा सहजता ल्याउनेछ र ढुवानी खर्च कम हुनेछ । जनकपुरका व्यवसायी रामनरेश साह भन्छन्, ‘कलकत्ता बन्दरगाह हुँदै नेपालमा आउने सामान अहिले महँगो पर्छ । कार्गो रेल्वे सञ्चालन भए ढुवानी खर्च घट्नेछ र समयमै सामान पाउने सुविधा पनि हुनेछ ।’

कार्गो रेल्वे सञ्चालन भएपछि नेपालको भौतिक पूर्वाधारमा नयाँ अध्याय थपिने मात्र नभई स्थानीय बजारमा प्रतिस्पर्धा र सस्तो मूल्यमा वस्तु उपलब्ध गराउन मद्दत पुग्नेछ । रेलमार्ग विस्तारसँगै नेपाल र भारतबीचको आर्थिक सहकार्य अझ प्रगाढ हुने व्यवसायीहरूको विश्वास छ ।