सप्तरी, ५ असोज । आवश्यक कागजात नबोक्दा उज्जेवकिस्तानकी दुई विदेशी महिलालाई सप्तरी प्रहरीले नियन्त्रणमा लिएको छ ।

उज्जेवकिस्तानकी ३९ वर्षीया शेशिस्ता अकवारोवा र ३८ वर्षीया फेरुजा याख्सीमुरा तोवालाई नेपालबाट भारतको लौकहा बजारतर्फ लैजाने प्रयास गरिरहेका भारतीय नागरिक २० वर्षीय नितिश कुमार बिन्दासँगै नियन्त्रणमा लिइएको हो ।

जिल्ला प्रहरी कार्यालय सप्तरीका प्रवक्ता एवम् प्रहरी नायब उपरिक्षक जीतेन्द्र कुमार बस्नेतका अनुसार भारतीय नागरिक नितिश कुमार बिन्दाले विआर ०७ ए वाई १८७६ नम्बरको मोटरसाइकलमा महिलाहरुलाई राखी भारततर्फ लैजान खोजेका थिए । बिन्दा भारतको बिहार राज्य मधुवनी जिल्ला लालमनियाडुमरवाना ग्राम पञ्चायत निवासी रहेको खुलासा भएको छ ।

प्रहरीले अनुसन्धानका क्रममा पत्ता लगाएको विवरण अनुसार बिन्दाले ती महिलाहरुलाई आफैं नचिनेको, रातिको समयमा एकान्त स्थलमा अलपत्र भेटेपछि सुरक्षाका लागि लौकहा बजारसम्म पुर्याइ दिन लिफ्ट दिएको बताएका छन् ।

महिलाहरुले प्रहरी समक्ष आफूहरू घुम्न नेपाल आएको र बाटो बिराएर यस स्थानमा पुगेको बताएकी छन् । उनीहरुसँग पासपोर्ट भएको भए पनि काठमाडौँमा भाडामा बसेको लजमा छोडेकी बताएकी छन् । प्रहरीका अनुसार महिलाहरुको बयान अनुसार उनीहरुलाई लिफ्ट दिएको बिन्दासँग सम्बन्धमा थप अनुसन्धान भइरहेको छ ।

प्रहरी नायब उपरिक्षक बस्नेतले भने, ‘महिलाहरुको बयानको आधारमा काठमाडौँमा बस्ने लजबाट उनीहरुको पासपोर्ट झिकाउने काम तथा समग्र घटनाक्रमबारे सुक्ष्म अनुसन्धान भइरहेको छ । कुनै आपराधिक तत्वको संलग्नता भएमा आवश्यक कारबाही गरिनेछ ।’