महोत्तरी, ५ असोज । महोत्तरीको बर्दिबास–३ गौरीडाँडास्थित बीपी राजमार्गमा आइतबार बिहान प्रहरीले सवारी चेकजाँच गर्ने क्रममा ९७ ग्राम बढी ब्राउन सुगरसहित एक युवकलाई नियन्त्रणमा लिएको छ ।

लागुऔषध नियन्त्रण ब्युरो शाखा कार्यालय बर्दिबास र इलाका प्रहरी कार्यालय बर्दिबासको संयुक्त टोलीले गाईघाटबाट काठमाडौँतर्फ जाँदै गरेको बा.५ ख १८९८ नम्बरको हायस सवारी चेकजाँच गरेको थियो । चेकजाँचको क्रममा चालक नजिकैको सीटमा बसेका सिरहा मिर्चैया नगरपालिका–६ का २४ वर्षीय रोहित महतोको साथबाट लागुऔषध फेला परेको छ ।

लागुऔषध नियन्त्रण ब्युरो बर्दिबासका प्रमुख सरोज अधिकारीका अनुसार महतोको साथमा रहेको खैरो रङको हाफकट्टु तलासी गर्दा सेतो प्लास्टिकमा प्याक गरेर लुकाइछिपाइ राखिएको ब्राउन सुगर बरामद भएको हो । डिजिटल तराजुमा तौल गर्दा प्लास्टिकसहितको तौल १०२ ग्राम २५० मिलिग्राम र शुद्ध तौल ९७ ग्राम १६० मिलिग्राम रहेको छ ।

यसअघि भदौ ८ र १७ गते पनि ब्युरो प्रमुख अधिकारीकै टोलीले बीपी राजमार्गमा ब्राउन सुगरसहित दुई जनालाई पक्राउ गरेको थियो । यसरी निरन्तर निगरानी र गस्तीको माध्यमबाट लागुऔषध तस्करी रोकथाममा प्रभावकारी कदम चालिएको अधिकारीहरूले जानकारी दिएका छन् ।

पक्राउ परेका महतोसहित बरामद ब्राउन सुगरलाई आवश्यक कारबाहीका लागि इलाका प्रहरी कार्यालय बर्दिबासमा बुझाइएको छ । प्रहरीले अनुसन्धानको क्रममा लागुऔषध तस्करीको स्रोत र सम्बन्धित अन्य व्यक्तिहरूको पहिचान गर्ने तयारी गरिरहेको छ ।