महोत्तरी, ५ असोज । गत भदौ २४ गते जेनजीद्वारा सञ्चालन गरिएको प्रदर्शनको आडमा जलेश्वर कारागारबाट भागेका पाँच सय ७६ कैदीबन्दीमध्ये २३३ जना फर्किएको अधिकारीहरूले जानकारी दिएका छन् । तर, अझै तीन सय ४३ जना कैदीबन्दी अज्ञात छन् ।

कारागार प्रशासनका अनुसार भदौ २४ गते मङ्गलबार राति करिब ७ बजे करिब ५०० प्रदर्शनकारी जलेश्वर कारागार पुगेका थिए । उनीहरूले आफूलाई ‘जेनजी’ भन्दै कारागारको तीन तहको ढोका तोडेर कैदीबन्दीहरूलाई भागाएको थियो । कारागारमा भारतीयसहित कुल ५७६ जना कैदीहरू रहेका थिए ।

जेलर अशोक क्षेत्रीले भने, ‘कैदीबन्दी फरार भएको भोलिपल्टै भदौ २५ गते कारागार प्रशासनले फरारहरूलाई तुरुन्तै फर्किन आह्वान गरेको थियो । आइतबार बिहानसम्म दुई सय ३३ जना फर्किसकेका छन् । उनीहरूको सुरक्षा र कारागार व्यवस्थापनका लागि आवश्यक कदम चालिएको छ ।’

जलेश्वर कारागारबाट भागेका १२ जना कैदी भारततर्फ जाँदै गरेका अवस्थामा भारतीय प्रहरीले पक्राउ गरी पुनः कारागार फर्काउने सहयोग गरेको जेलर क्षेत्रीले बताए । बाँकी कैदीबन्दी आफैं कारागार फर्किएका हुन् ।

जेलबाट अझै नफर्केका ३४३ कैदीबन्दीको खोजीका लागि जिल्लाका तीनै तहका सुरक्षाकर्मी परिचालित छन् । प्रमुख जिल्ला अधिकारी नारायणप्रसाद रिसालका अनुसार जेनजीको प्रदर्शनको समयमा भएको यस घटनापछि कैदीबन्दीको खोजी र सुरक्षा व्यवस्थापनमा उच्च सतर्कता अपनाइएको छ । आवश्यक सुरक्षा संयन्त्र र प्रशासनिक कदमहरू कार्यान्वयनमा छन् ।