सर्लाही, ५ असोज । नक्कली विवरण पेश गरी नेपाली नागरिकता दिलाउन सहयोग गरेको आरोपमा सर्लाहीको पर्सा गाउँपालिका–४ का वडाध्यक्ष सुवोध राय यादव पक्राउ परेका छन् ।

उनलाई आइतबार प्रहरीले नियन्त्रणमा लिएर जिल्ला अदालत सर्लाहीमा पेश गरेको थियो । अदालतले प्रारम्भिक अनुसन्धानका लागि १५ दिनसम्म हिरासतमा राख्न अनुमति दिएको छ ।

प्रहरीका अनुसार वडाध्यक्ष यादवले चार जनालाई झुटा वतन र विवरणका आधारमा जिल्ला प्रशासन कार्यालय सर्लाहीमार्फत नागरिकता दिलाउन सिफारिस तथा सनाखत गरेका थिए । सोही आधारमा यादवमाथि प्रत्यक्ष संलग्नता रहेको आशंकामा अनुसन्धान अघि बढाइएको हो ।

जिल्ला प्रशासन कार्यालय सर्लाहीले गत वर्ष असार ३ गते एक पत्रमार्फत नागरिकता सम्बन्धी अनियमितताको आशंका प्रष्ट्याउँदै कारबाहीको माग गरेको थियो । सो पत्रका आधारमा जिल्ला प्रहरी कार्यालयले मुद्दा दर्ता गरी अनुसन्धान सुरु गरेको जनाएको छ ।

जिल्ला प्रहरी कार्यालय सर्लाहीका प्रमुख प्रहरी उपरिक्षक रविरन्द्र बहादुर सिंहले भने, ‘चार जनाले नक्कली विवरणमार्फत नागरिकता लिन खोजेका थिए । यसमा सिफारिस गर्ने निकायकै संलग्नता देखिएकोले वडाध्यक्ष यादवलाई नियन्त्रणमा लिइएको हो । हाल थप प्रमाण संकलन र अनुसन्धान जारी छ ।’

जिल्ला अदालत सर्लाहीले यादवलाई पेशिपछि अनुसन्धानलाई सहज बनाउन १५ दिनको म्याद थप गरेको छ । प्रहरीले सो अवधिमा फेला पर्ने प्रमाण संकलन, अन्य संलग्न व्यक्तिहरूको नामावली, नागरिकता प्रक्रियामा भएको अनियमितता र सम्भावित दलाली जालोबारे अनुसन्धान गर्ने जनाएको छ ।

नागरिकता संवेदनशील विषय भएकाले यस किसिमको घटना राष्ट्रिय स्वाधीनता र कानूनी प्रक्रियाप्रति चुनौती पेश गर्ने विषय बनेको छ । स्थानीयवासी र सरोकारवालाहरूले जिम्मेवार पदमा रहेका व्यक्तिबाटै नागरिकता प्रक्रियामा अनियमितता भएकोमा चिन्ता व्यक्त गरेका छन् ।

प्रहरीले यस प्रकरणमा संलग्न अन्य व्यक्तिहरूको पहिचान, फर्जी विवरण तयार गर्ने समूह र सम्भावित दलालहरूको खोजीमा कडा कदम चाल्ने योजना बनाएको छ । वडाध्यक्ष यादवमाथि कानूनी प्रक्रिया पूरा गरेपछि आवश्यक अभियोग दर्ता हुने पनि प्रहरीको भनाइ छ ।