पर्सा, ४ असोज । वीरगंज महानगरपालिकाले चालु आर्थिक वर्ष २०८२–८३ का लागि विनियोजन गरिएको बजेट संशोधन गरी प्रमुख ध्यान पुनःनिर्माणमा केन्द्रित गर्ने निर्णय गरेको छ । शनिबार सम्पन्न विशेष नगर अधिवेशनले पुनःनिर्माणसम्बन्धी प्रस्ताव सर्वसम्मत पारित गरेको हो ।

गत भदौ २४ गते जेनजी आन्दोलनका क्रममा महानगरपालिकाको कार्यालय भवनसहित सम्पूर्ण संरचना आगजनी, तोडफोड र लुटपाटबाट ध्वस्त भएको थियो । नगरवासीलाई सेवा निरन्तरता सुनिश्चित गर्न र प्रशासनिक संरचना पुनःस्थापना गर्न विशेष नगरसभाले चालु आर्थिक वर्षको बजेट संशोधन गरेर पुनःनिर्माणतर्फ लगानी गर्ने निर्णय गरेको हो ।

विशेष नगरसभामा महानगर प्रमुख राजेशमान सिंहले संशोधित बजेट प्रस्तुत गरेका थिए । १७औँ नगर परिषद्ले यसअघि आर्थिक वर्ष २०८२–८३ का लागि ३ अर्ब २२ करोड ४८ लाख ४९ हजार रुपैयाँको बजेट ल्याएको थियो । संशोधनपश्चात करिब ३० करोड रुपैयाँ पुनःनिर्माण, प्रशासनिक भवन निर्माण, सवारी साधन खरिद, मेसिनरी उपकरण, ल्यापटप, कम्प्युटर, प्रिन्टर, फर्निचर खरिद, कार्यालय भवन मर्मत, गाडी भाडा, बिजुलीबत्ती र अन्य आवश्यक सामग्री खरिदमा खर्च हुने प्रावधान गरिएको छ ।

त्यसैगरी, विशेष अधिवेशनले जेनजी आन्दोलनका क्रममा काठमाडौँमा भएको प्रदर्शनमा प्रहरीको गोली लागेर वीरगंज महानगरपालिका वडा नं. १२ का युवा असहाब आलमको परिवारलाई पाँच लाख रुपैयाँ उपलब्ध गराउने प्रस्ताव पनि सर्वसम्मत पारित गरेको छ ।

नगरसभा स्रोतका अनुसार संशोधित बजेटमार्फत तत्काल नगर पुनःनिर्माण, भौतिक संरचना पुनस्र्थापना र प्रशासनिक क्षमता अभिवृद्धि गर्ने कार्य अघि बढाइनेछ । महानगरपालिकाले यस कदममार्फत नगर सेवा सुचारु गर्ने र नागरिक विश्वास पुनःस्थापना गर्ने लक्ष्य राखेको जनाएको छ ।