जनकपुरधाम, ४ असोज । गैरसरकारी संस्था पिपल प्रोमोट सेन्टरले शनिवार भव्य कार्यक्रमका साथ आफ्नो १७औँ वार्षिक साधारण सभा र ६औँ अधिवेशन सम्पन्न गरेको छ ।

साधारण सभामा संस्थाले हालसम्मका उपलब्धि र आगामी योजनाहरू सार्वजनिक गर्दै आगामी वर्षका कार्यक्रमहरूका बारेमा जानकारी दिएको छ ।

संस्थाका अध्यक्ष कमलेश कुमार मण्डलको अध्यक्षतामा सम्पन्न सभामा नेम्वर राईले प्रगति प्रतिवेदन प्रस्तुत गरेका थिए । प्रतिवेदन अनुसार संस्था स्थापना भएको वि.सं. २०६४ सालदेखि सामाजिक विकास, क्षमता विकास, नागरिक समाज सुदृढीकरण, शिक्षा, स्वास्थ्य, खानेपानी, लैङ्गिक समानता, वातावरण, कृषि तथा जीविकोपार्जनलगायतका क्षेत्रमा निरन्तर कार्य गर्दै आएको छ ।

विशेषतः मधेश प्रदेशका ७० स्थानीय तहमा विद्यालय शिक्षा योजना तयार पारिएको छ भने तीमध्ये ५५ स्थानीय तहले योजना स्वीकृत गरिसकेका छन् । कक्षा १ देखि ३ सम्मका शिक्षकलाई बहुभाषिक शिक्षण सिकाइ प्रक्रिया र एकीकृत पाठ्यक्रम सम्बन्धी क्षमता अभिवृद्धि तालिम दिइएको छ । साथै ४२ घरपरिवारलाई स्वास्थ्य तथा दुर्घटना बीमा उपलब्ध गराइएको, चुरे संरक्षण, वातावरण तथा जल संरक्षणसम्बन्धी सार्वजनिक सुनुवाइ कार्यक्रम सञ्चालन गरिएको छ । गुणस्तरीय शिक्षा र समुदाय सशक्तीकरणका लागि विभिन्न क्षमता अभिवृद्धि कार्यक्रम पनि जारी रहेका छन् ।

संस्थाले आगामी योजनामा संसदीय निगरानी तथा सार्वजनिक सुनुवाइ कार्यक्रम, मुसहर समुदायका महिलाका लागि जीविकोपार्जन सुधार, लैङ्गिक हिंसाविरुद्धका कार्यक्रम, जलवायु परिवर्तन तथा वातावरण अनुकूलन अध्ययन, खानेपानी र सरसफाई, भौतिक पूर्वाधार निर्माण तथा दलित–उत्पीडित महिला र फरक क्षमताका व्यक्तिहरूका लागि सीपमूलक तालिम सञ्चालन गर्ने योजना सार्वजनिक गरेको छ ।

सभामा शिक्षा तथा संस्कृति मन्त्रालयका प्रशासकीय प्रमुख दिलीप मुखियाको प्रमुख आतिथ्य रहेको थियो । कार्यक्रममा वरिष्ठ पत्रकार श्यामसुन्दर शशी, कैलास दास, युनिसेफ नेपालका इन्द्रप्रसाद गुप्ता, प्रेक्षा मल्ल, डा. प्रमोदकुमार यादव, लक्ष्मेश्वर मण्डल र लालबाबु हातीसहितका वक्ताहरूले आफ्ना विचार व्यक्त गरेका थिए ।

संस्थाले सामाजिक विकास, शिक्षा, स्वास्थ्य र वातावरणीय संरक्षणका क्षेत्रमा निरन्तर काम गर्दै आएको भन्दै सहभागीहरूले यसलाई सराहना गरेका थिए ।