सप्तरी, ४ असोज । जेनजी आन्दोलनको क्रममा भदौ २५ गते सप्तरी कारागारमा भएको तोडफोड र आगजनीपछि फरार भएका कैदीबन्दीमध्ये अहिलेसम्म ८४ जनालाई प्रहरीले नियन्त्रणमा लिएको छ ।

जिल्ला प्रहरी कार्यालय सप्तरीका प्रहरी नायव उपरीक्षक जितेन्द्रकुमार बस्नेतका अनुसार कारागारमा कुल ३९७ कैदी रहेका थिए । जसमा २०५ जना फरार भएका थिए । तीमध्ये प्रहरीले विभिन्न स्थानबाट ८४ जनालाई पक्राउ गरिसकेको छ ।

कारागार प्रमुख गंगालाल योगीले फरार कैदीहरूमध्ये दुईजनाले आत्महत्या गरेको पुष्टि गरेका छन् । अझै सम्पर्कमा नआएकाहरूलाई नजिकको प्रहरी कार्यालय वा कारागारमा छिट्टै उपस्थित हुन अपिल गरिएको छ ।

भदौ २५ गते बुधबार जेनजी आन्दोलनकै क्रममा कैदीहरूले कारागारभित्र आगजनी गरी मुख्य गेट फोडेर फरार भएका थिए । सो क्रममा करिब दुईतिहाइ कैदी बाहिरिएका थिए । प्रहरीले फरार कैदीहरूको खोजीलाई प्राथमिकताका साथ अघि बढाइरहेको छ । सीमावर्ती क्षेत्रमा विशेष निगरानी बढाइएको छ भने प्रहरीका विशेष टोलीहरू सप्तरीसहित आसपासका जिल्लामा परिचालन गरिएको डीएसपी बस्नेतले जानकारी दिए ।

फरार कैदीहरूमध्ये कर्तव्य ज्यान, बलात्कार र लागुऔषध कारोबारजस्ता गम्भीर अपराधमा सजाय भोगिरहेका धेरैजसो रहेका कारण सुरक्षाप्रति चासो बढेको छ । प्रहरीले स्थानीयवासीलाई सतर्क रहन र कुनै असामान्य गतिविधि देखिए प्रहरीमा सूचना दिन आग्रह गरेको छ ।

यसैबीच, कारागार प्रशासनले क्षतिग्रस्त संरचनाको मर्मत कार्य शुरु गर्ने तयारी थालेको छ । तर, फरार कैदीहरूको खोजी अभियान जारी रहँदा सप्तरी कारागार घटनाले देशभरका कारागार व्यवस्थापन, सुरक्षा तयारी र प्रहरी–प्रशासनको समन्वयमाथि गम्भीर प्रश्न उठाएको छ ।