जनकपुरधाम, ४ असोज । मधेश प्रदेशका मुख्यमन्त्री सतिश कुमार सिंहले दशैं सकिएलगत्तै प्रदेश सरकारले प्रदान गर्ने सबै सेवा पूर्ण रूपमा नियमित रूपमा सञ्चालनमा आउने बताएका छन् ।

लामो समयदेखि राजनीतिक अस्थिरता, मन्त्री फिर्ता र आन्दोलनपछिको अव्यवस्थाले प्रभावित भएका सेवाहरू अब व्यवस्थित रूपमा अघि बढ्ने मुख्यमन्त्री सिंहले बताए ।

शनिबार जनकपुरधाममा सञ्चारकर्मीसँग कुरा गर्दै उनले भने, ‘जनताको सेवा रोकिएको छैन । तर, व्यवस्थित रूपमा अघि बढाउन केही समय लागेको हो । दशैंपछि सबै सेवा सुचारु गरेर प्रदेश सरकारलाई गतिशील बनाइने छ ।’ उनले प्रदेश सरकार स्थायित्वतर्फ उन्मुख भएको र जनताले अपेक्षा गरेका काममा ढिलाइ भए पनि अब गति दिने आश्वासन दिएका छन् ।

हालको राजनीतिक परिस्थितिमा प्रदेशसभा भवन क्षतिग्रस्त हुनु, प्रशासनिक अवरोध र कार्यप्रवाहमा ढिलाइका कारण सेवामा असर परेको उनले बताए । तर, यी सबै समस्याहरू क्रमशः समाधानको चरणमा पुगेको उनले जानकारी दिए ।

मुख्यमन्त्री सिंहले विशेषगरी शिक्षा, स्वास्थ्य, कृषि र भौतिक पूर्वाधार क्षेत्रका योजनाहरू दशैंपछि तीव्र गतिमा अघि बढाउने बताए । उनले प्रदेश सरकार जनताको विश्वास जित्न प्रतिबद्ध रहेको दोहोर्याए ।

यस्तै, संघीयताको प्रभावकारिता मधेशमै देखाउनुपर्नेमा जोड दिँदै सबै राजनीतिक दलबीच साझा समझदारी आवश्यक रहेको उनले बताए । मुख्यमन्त्री सिंहको भनाइ अनुसार आगामी दिनमा प्रदेश सरकार स्थिरतासहित जनतामुखी नीति र सेवा प्रवाहमा केन्द्रित हुनेछ ।